O Partido Popular súmase ao movemento do software libre, co que deseñará a súa nova web

A nova páxina web do Partido Popular estará deseñada en software libre, segundo adiantou o vicesecretario de Comunicación do partido, Esteban González Pons, quen leva varios meses traballando nesa web, a cal potenciará as redes sociais e será máis dinámica. “Imos utilizar no seu deseño o software non propietario e imos facela en código aberto porque no PP cremos que o software debe ser de todos e debe compartirse porque a ciencia e o coñecemento teñen que circular con liberdade”, explicou González Pons.

Así, o responsable de Comunicación dos ‘populares’ sinalou que na páxina de inicio da propia web precisarase que foi elaborada con software libre. Con esta iniciativa o Partido Popular súmase tamén ao movemento do software libre, o cal viña sendo abanderado, xeralmente, polos partidos de tendencia máis progresista.

González Pons leva varios meses preparando o lanzamento da nova web e que previsiblemente estará lista nas vindeiras semanas. Este sitio, que será máis dinámico e aberto, potenciará a participación dos cidadáns a través das redes sociais e conectará mellor cos militantes.

O PP quere aproveitar as posibilidades da web 2.0 e das redes sociais. Un dos obxectivos é conquistar ao maior número posible de xente nova que está enganchada diariamente ao Facebook. Twitter ou Tuenti.

O Partido Popular xa impulsou as redes sociais durante a campaña electoral a través de varios foros pero agora quere dar un paso máis aló e espremer ao máximo as posibilidades de comunicación que ofrece Internet e as novas tecnoloxías. A campaña que realizou Barack Obama está a servir de inspiración aos ‘populares’.

 

Fonte: Europa Press