GaliciaPMS ofrece un completo directorio de ferramentas informáticas de Software Libre para a xestión diaria das empresas así como acceso á descarga do DVD da peme de Mancomún
O portal GaliciaPMS vén de ampliar o número de aplicacións dispoñibles no directorio de ferramentas informáticas de Software Libre para as pequenas e medianas empresas recollido inicialmente por Mancomún no “DVD de Ferramentas Informáticas para a peme“.
O total das aplicacións permiten desenvolver un importante número de tarefas propias das empresas na súa actividade cotiá como realizar chamadas telefónicas a través de Internet, xerar facturas electrónicas, instalar antivirus, manter o control das contas, xestionar a axenda ou visionar documentos de audio ou vídeo.
Os programas incluídos caracterízanse pola súa facilidade de instalación e uso, ofrecéndose a posibilidade de realizar as descargas para os sistemas operativos Linux, Mac e Windows.
Na mesma sección do portal GaliciaPms tamén é posible descargar o DVD de Ferramentas informáticas para pemes de Mancomún que inclúe, a maiores, outros programas complementarios, así como información adicional de interese para a instalación e o uso dos mesmos.
