O pasado sábado 15 de setembro celebrouse mundialmente o Día da Liberdade do Software ou Software Freedom Day.
Dende o ano 2004, o terceiro sábado do mes de setembro. festésaxe o Día da Liberdade do Software. Trátase dunha celebración a nivel mundial adicada á exaltación, difusión, promoción, … do Software Libre. O principal obxectivo é concienciar ao público sobre os beneficios de empregar este tipo de tecnoloxías de alta calidade tanto en ámbitos empresariais como en administracións públicas, educativas ou nos fogares. En resume, un día especial para insistir nas bondades do software libre e deixar ver que se trata dunha tecnoloxía madura e de calidade capaz de ofrecer solucións en calquera ámbito.
O software libre nas empresas galegas
Esta calidade semella estar xa callando entre as empresas da nosa terra, como reflicten os datos recollidos no estudo publicado recentemente polo CENATIC.
Así un 80% das empresas galegas con máis de 10 traballadores utilizan software libre, o que supón un incremento de 5 puntos máis respecto do ano anterior. No entanto, no caso das microempresas, con menos de 10 empregados, só o 45,5% usan Software Libre o que semella que sería preciso adicar un maior esforzo neste colectivo para achegarlle as vantaxes da incorporación deste tipo de tecnoloxías.
Uso de Software Libre nas empresas de máis de 10 empregados
Segundo a nota publicada a pasada semana pola Xunta de Galicia, analizando os datos da nosa comunidade do informe de CENATIC, o incremento do uso de software libre nas empresas de máis de 10 traballadores rexístrase nos tres sectores de actividade analizados por CENATIC:
-
Sector servizos, cun crecemento interanual de 7,9 puntos (75,6% das empresas no 2011 fronte ao 83,5% de 2012)
-
Sector da construción (81,1% no 2011 e 82,4% no 2012)
-
Industria (71% no 2011 e 73,2% no 2012).
Este incremento débese en boa media a un maior uso dos navegadores web de software libre, utilizados polo 75,1% das empresas con máis de 10 traballadores no ano 2012, pero tamén ao uso de aplicacións ofimáticas (56,8%), de sistemas operativos (32,2%) e doutras aplicacións de uso libre.
Os datos achegados polo Observatorio do Centro Nacional de Referencia do Sofware Libre (CENATIC) confirman que as empresas de maior tamaño apostan polo software libre, como estratexia para mellorar a produtividade e reducir custos. Neste senso, no conxunto do Estado, un 82,3% das empresas con máis de 250 traballadores utilizaron esta tipoloxía de software durante o ano 2011.
Uso de Software Libre nas empresas de menos de 10 empregados
No caso das empresas de menos de 10 empregados só o 45,5% recoñece que utilizou algunha tipoloxía de software de código aberto durante o ano 2011. As ferramentas informáticas máis utilizadas polas microempresas galegas foron os navegadores de Internet (36%) e as aplicacións ofimáticas (29,8%), como é o caso de Mozilla Firefox e Open Office respectivamente. Esta preferencia tamén se observa noutras Comunidades Autónomas e nos diferentes sectores de actividade, especialmente no sector TIC.
