Os distintos centros da Rede de Dinamización da Sociedade da Información están a presentar, nesta primeira quincena do ano, o seu programa de actividades de alfabetización dixital de cara aos vindeiros meses. Un programa no que software libre se presenta como un dos contidos fundamentais, ben sexa a través da iniciación no sistema operativo Linux ou ben a través doutros aplicativos con funcionalidades máis específicas tales como o Writer, o Impress…
Nunha previsión a curto prazo, as persoas interesadas en iniciarse neste eido poderán asistir, entre outros, a obradoiros sobre o procesador de textos Writer, no no Concello de Teo e no de Pontevedra, sobre o programa de presentacións multimedia Impress e sobre o aplicativo para o tratamento de imaxes Gimp no Concello de Teo. Ademais, impartiranse tres cursos de iniciación ao sistema operativo Linux en Sada, en Vicedo e en Culleredo.
Campaña promocional da Rede de Dinamización
A presentación destes cursos sitúase en plena campaña promocional da Rede de Dinamización de Sociedade da Información, a cal se prolongará até finais de xaneiro. Esta está a consistir en diversos anuncios televisivos e en prensa, cuñas radiofónicas, banners en Internet e diversos actos promocionais, así como regalos publicitarios.
O seu principal obxectivo é dar a coñecer a Rede de Dinamización e as actividades e iniciativas ás que se poden acceder grazas á Rede.
A Rede de Dinamización da Sociedade da Información, enmarcada no Plano Estratéxico Galego da Sociedade da Información é unha das principais estratexias da Consellería de Innovación e Industria para o desenvolvemento das políticas de inclusión da Sociedade da Información e o desenvolvemento rural.
