O Observatorio Ramón María Aller da USC, da man de José Ángel Docobo como director do centro e Pedro Pablo Campo Díaz como coordinador das actividades, organiza, dentro do seu programa de actividades do Ano Internacional da Astronomía e a Semana da Ciencia galega 
un obradoiro de recursos de rede e de software libre de Astronomía.
A xornada, dirixida ao público en xeral, celebrarase o vindeiro 13 de novembro en horario de 17.00 a 20.00 horas na Aula de informática da Facultade de Matemáticas da universidade compostelá.
O obxectivo do obradoiro é achegar aos asistentes información que lles permita discriminar entre a inxente cantidade de datos e recursos relacionados coa astronomía e outros eidos científicos existentes na rede cales son útiles e veraces e cales non. Ademais de enderezos web onde atopar información útil e interesante, no obradoiro daranse tamén nocións básicas sobre o modo de emprego dos principais programas de software libre de Astronomía.
Algúns dos aplicativos libres máis populares no campo da astronomía son o Celestia ou o Stellarium, como xa nos contou o ano pasado Rubén Díaz na entrevista que lle fixemos a raíz do Obradoiro de software libre para a astronomía celebrado no 2008 en Rianxo.
Fonte: Código cero
