A Aula de informática municipal de Teo, organiza obradoiros de robótica para rapaces, este verán de balde.
Obradoiros de robótica
Scratch
O primeiro baixo o título Scratch+Lego, do 13 ao 17 de xullo de 10.00 a 12.00 horas, está dirixido a nenos empadroados no Concello (de 8 aos 11 anos).
Será na Aula de informática municipal. As persoas participantes construirán robots e comezarán a programar con Scratch.
Scratch é unha linguaxe de programación visual desenvolto polo Grupo Lifelong Kindergarten do MIT Media Lab.
A sua principal característica consiste en que permite o desenvolvemento de habilidades mentais mediante a aprendizaxe da programación sen ter coñecementos profundos sobre o código.
As súas características ligadas ao fácil entendemento do pensamento computacional fixeron que sexa moi difundido na educación de nenos, adolescentes e adultos. As habilidades adquiridas mediante Scratch, pódense aplicar a outras linguaxes básicas de programación como Python e Java.
Arduino
O segundo obradoiro é sobre Arduino, plataforma de desenvolvemento baseada nunha placa electrónica de hardware libre que incorpora un microcontrolador programable e unha serie de pins que aprenderán a recoñecer os asistentes ao obradoiro.
Neste caso está dirixido a nenos empadroados de 12 aos 16 anos e celebrarase do 20 ao 24 de xullo de 10.00 a 12.00 horas.
Arduino é unha compañía de desenvolvemento de software e hardware libres, así como unha comunidade internacional que deseña e manufactura placas de desenvolvemento de hardware para construír dispositivos dixitais e dispositivos interactivos que poidan detectar e controlar obxectos do mundo real. Arduino enfócase en achegar e facilitar o uso da electrónica e programación de sistemas embebidos en proxectos multidisciplinarios.
Inscrición
Para anotarse hai que entregar a ficha de inscrición que se pode descargar nesta ligazón e presentala por Sede electrónica ou no Rexistro Xeral do Concello.
O prazo está aberto do 30 de xuño ao 10 de xullo para o curso de Scratch+Lego e ata o 17 para o de Arduino. As prazas ofertadas son 8 para cada un dos talleres e debe haber un mínimo de 5 inscricións para realizar a actividade. As prazas serán asignadas por orde de inscrición.
