Canonical acaba de lanzar un proxecto, One Hundred Paper Cuts, para mellorar a experiencia do usuario con Ubuntu, mediante a corrección dun cento de pequenos problemas de usabilidade. O proxecto estará liderado polo equipo de deseño e da experiencia do usuario e nel tratarase de identificar 100 pequenos problemas que teñan os usuarios, os denominados “paper cuts” e posteriormente, arranxalos.
Na web do proxecto fan unha serie de recomendacións á hora de notificar estas pequenas incidencias:
-
Tentar identificar problemas que atinxen ao sistema operativo en xeral (Nautilus, Gnome, etc…) e non a aplicativos específicao F-Spot, OpenOffice.org, Terminal, etc.)
-
Informar de erros que afectan ao fluxo de traballo (como a conexión á rede, copiado de ficheiros, navegación de cartafoles, etc..)
-
Que sexan erros sinxelos de arranxar, en lugar dos que requiran un grande esforzo de deseño e desenvolvemento.
-
Notificar de incidencias con características actuais, en lugar de pedir novas características.
David Siegel, o desenvolvedor do popular lanzador de aplicativos GNOME-Do, e recentemente incorporado ao equipo de deseño e mellora da experiencia de Canonical, comenta no seu blog o obxectivo deste proxecto:
"Se algún pequeno detalle de usabilidade che estivo molestando versión tras versión, agora tes a oportunidade de que reciba a atención que se merece e se podemos arranxar un cento destes pequenos erros, Ubuntu 9.10 será seguramente a máis usábel das versións de Ubuntu até o de agora”.
