Opera vén de liberar a primeira alpha da súa nova ferramenta de desenvolvemento web, Opera Dragonfly, baixo licenza BSD. Esta versión está destinada a desenvolvedores ou xente que queira probar o seu funcionamento reportando os erros ou suxestión conseguindo mellorar e retroalimentar o proxecto.
A fundación de Opera Dragonfly traballou durante máis de dous anos e as fases que ten completadas son:
- Entrevistas con desenvolvedores web para coñecer o uso das ferramentas de desenvolvemento e deseñar a nova ferramenta.
- Primeiros prototipos para o inspector da árbore DOM e DOM snapshot.
- Implementación do protocolo Scope.
- Desenvolvemento das novas características para o depurador de Javascript e inspector de CSS/DOM.
O desenvolvemento de Opera Dragonfly fíxose dende cero tendo en mente a posibilidade de depurar aplicacións Web sobre dispositivos remotos.
A próxima versión (a alfa-2) estará dispoñible co lanzamento de Kestrel, nome en código de Opera 9.5, coas seguintes melloras:
- Mellora da manipulación dos fíos no depurador de JavaScript.
- Edición en liña de CSS.
- Infraestrutura de localización.
- Mellorar a depuración remota.
Pódese descargar o código fonte para o seu uso e estudio podendo contribuír a outros proxectos como Firebug ou Drosera.
