O vindeiro día 9 de novembro péchase o período de inscricións-despois de ser ampliado en 10 días- para o concurso Mariana Baraj, organizado pola primeira comunidade de música colaborativa, RedPanal.org. O concurso ten como obxectivo promover a música colaborativa propoñendo aos participantes crear novas pezas musicais a partir de material achegado por Redpanal.org, grabado en estudo xunto a artista arxentina de folclore latinoamericano, Mariana Baraj.
Os organizadores do premio insisten no feito de que para participar só é preciso un computador e conexión a Internet, ademais do teu instrumento ou o material que se queira engadir.
Ademais , na propia web de RedPanal, ofrécese un menú de programas do proxecto social GNU do que se pode descargar e baixar manuais de programas de software libre para poder editar a túa música. Por exemplo, podes baixar o programa Audacity.
