O pasado sábado, día 19 de setembro foi o Software Freedom Day, un día dedicado á difusión dos beneficios do software libre en todos os ámbitos: educación, empresas, administración e usuarios en xeral.
Dende Mancomún queremos unirnos ás diversas celebracións que están tendo lugar por todo o mundo coa publicación no noso wiki da documentación de apoio para a capacitación TIC en software libre cunha licenza Creative Commons: Recoñecemento-CompartirIgual 3.0.
Esta documentación foi elaborada como material didáctico do Plan de capacitación TIC en software libre posto en marcha por Mancomún co obxectivo de formar o empresariado TIC galego para que sexa quen de abordar proxectos de implantación de servizos básicos en software libre: ofimática, Internet, ferramentas de traballo colaborativo e de publicación web. Este plan contou con dúas edicións, unha primeira celebrada en xuño de 2008 na cidade de Santiago de Compostela e outra en xaneiro de 2009 na cidade de Vigo.
O interese espertado por este plan de capacitación na comunidade galega foi elevado aínda que, debido a certas características da formación como a concentración intensiva das clases en venres e sábados en varios fins de semana consecutivos, a diversidade dos temas tratados, a limitación de prazas, … os beneficiarios non foron tantos como nos tería gustado.
Para tratar de chegar a un maior número de persoas, ademais de contribuír a incrementar o material formativo sobre software libre dispoñíbel en galego na web, publicamos hoxe estas guías. A súa concepción é servir de referencia ao persoal técnico informático para a súa formación, o que os capacite para desempeñar tarefas de implantación e/ou posterior servizo de asistencia ás ferramentas básicas dunha oficina informatizada con software libre: ofimática, internet e intranet.
As guías incluídas nesta documentación son:
- Introdución ao escritorio básico de oficina en rede con software libre
- Implicacións da planificación da migración / evolución cara o software libre
- Servizos básicos de intranet
- Servizos de correo electrónico
- Servizos de extranet: web e bases de datos
- Servizos de extranet: LDAP.
- Traballo en grupo
- Publicación web colaborativa
- Publicación web con Joomla
- Sistemas de comercio electrónico
- Integración dun CMS e dunha tenda virtual
Ademais a súa publicación no wiki, unha ferramenta colaborativa e aberta á participación de toda a comunidade, facilitará o enriquecemento deste material coas achegas que calquera persoa da comunidade pode facerlle.
Esta documentación foi elaborada pola empresa CTI TEGNIX S.L. para o Centro de Referencia e Servizos de Software Libre de Galiza – Mancomún.
