Este próximo xoves 11 de febreiro, Tomeu Vizoso, desenvolvedor de SugarLabs, estará en Coruña impartindo dous relatorios sobre o proxecto Sugar.
O primeiro deles será de carácter introdutorio, no que falará sobre a historia de Sugar, a comunidade que hai ao seu redor e das perspectivas de futuro. O segundo será máis semellante a unha sesión de traballo na que amosará como facer achegas ou corrección de erros ao proxecto.
Tomeu impartirá ambas sesións en español nas oficinas de Igalia, xa que é unha actividade do Máster en Software Libre, aínda que está aberta á participación de calquera, sen máis limitación que o aforo da sala:
- Sugar: pasado, presente e futuro, de 16:00 a 17:15
- Contribuír código a Sugar, 17:45 a 19:00
Sugar, naceu dentro do proxecto OLPC como unha peza chave na interacción co usuario, aínda que hoxe é multiplataforma e distribúese baixo licenza libre. Segundo a describen os seus desenvolvedores, trátase dun contorno de traballo alternativo ao tradicional software de escritorio, que promove a aprendizaxe colaborativa a través de actividades Sugar fomentando o pensamento crítico, chave do seu paradigma educativo. Está deseñada especialmente para nenos de entre 5 e 12.
