Roberto Brenlla informa que, desta volta, vai participar no Fórum Internacional Software Libre co relatorio "Sw Livre em Galicia: ejemplo de Comunidade, Políticas e Negócios".
Terá unha vez máis a oportunidade de representar a AGNIX, AGASOL, ASOLIF, e de promocionar Galicia nos eidos do SwL e a lusofonía.
Esta decimo primeira edición do FISL terá lugar entre os días 21 e 24 de xullo, no Centro de Eventos da Pontifícia Universidade Católica do Rio Grande do Sul, en Porto Alegre, Brasil.
Ademais da representación galega de Roberto Brenlla, está confirmada tamén a participación doutros principais expoñentes do FLOSS mundial. Así, estarán Scott Chacon, evanxelista de Git que traballa no proxecto GitHub; Wietse Venema, creador do Postfix; John Maddog Hall, prtesidente e fundador de Linux Internacional; Michael Hanselmann, administrador de sistemas para Google en Suiza … Pódese ver a lista dos primeiros confirmados na web do evento.
O Fórum Internacional Software Libre (fisl) é considerado o maior encontro de comunidades de software libre de América Latina e tamén un dos maiores do mundo.
É un punto de encontro anual, de persoas de todos os lugares do Brasil e do mundo para participar en debates técnicos e estratéxicos sobre o desenvolvemento e o uso do software libre. O fisl conta coa participación de empresarios, profesores, investigadores, estudantes, profesionais das áreas privada e pública, así como público en xeral. No ano pasado reuniu cerca de 8 mil persoas e contou con mais de 300 actividades.
Unha novidade en torno á organización do evento deste ano, é a innovadora proposta de creación dunha rede social personalizada, libre e independente en torno ao evento. Utilizando Noosfero, a primeira plataforma web libre para redes sociais desenvolvida no Brasil, e integrado no portal do software livre, os participantes estarán informados de todo o que vai acontecer no fisl11, ao tempo que poderán participar e colaborar antes e durante o evento coa xeración de contido e contribuír ao eito do fisl e do software libre.
Fonte: Tegnix
