Logo do éxito de convocatoria obtido no mes de outubro nos seminarios formativos sobre o xestor de contidos Drupal que se impartiron en Santiago de Compostela, o CDTIC decidiu organizar unha nova edición destes seminarios, desta volta en Redondela.
Así o Centro Demostrador TIC organiza os seminarios “Administración básica de Drupal” e “Administración avanzada de Drupal” que se celebrarán os días 24 de novembro e 1 de decembro respectivamente, en horario de 16:00 a 20:00 horas, na Aula CeMIT de Chapela (Redondela), situada no edificio da Asociación de Mulleres Agarimo.
No seminario do vindeiro 24 de novembro, administración básica, os asistentes coñecerán os fundamentos de Drupal 7 aprendendo a montalo dende cero e a xestionar unha páxina web utilizando este sistema de xestión de contidos. O segundo dos seminarios, administración avanzada, permitirá aos asistentes afondar na utilización e configuración de Drupal con características avanzadas do sistema.
Estes seminarios van dirixidos a profesionais TIC, responsables de xestionar as webs das empresas, ou traballadores autónomos etc. que queiran crear unha páxina web en Drupal ou ben xa administran unha e desexan afondar na súa utilización e na incorporación de máis funcións.
En ambos os dous seminarios, os asistentes contarán cun equipo informático para pór en práctica os conceptos e as ferramentas descritas na clase.
O encargado de impartir as sesións será Christian von Eitzen, enxeñeiro superior de Telecomunicacións que, desde o ano 1999, traballa desenvolvendo e dirixindo proxectos, e sendo responsable de diferentes sistemas web, comercio electrónico e plataformas en internet.
A asistencia a ambos seminarios é de balde, sendo tan só preciso inscribirse a través do o seu espazo usuario do portal web do CDTIC.
Os programas completos de ambos seminarios son:
- Administración básica de Drupal
- A web
- Os sistemas de xestión de contidos
- Presentación de Drupal 7
- Requisitos e instalación paso a paso
- Xestión básica de contidos (nodos, formatos de entrada, opcións de publicación, buscar contidos)
- Organización de contidos
- Xestión de menús
- Xestión de temas
- Introdución aos módulos
- Introdución ao CCK, nodos a medida
- Introdución aos bloques
- Administración avanzada de Drupal
- Boas prácticas en xestión de contidos
- Introdución aos sistemas de xestión de contidos
- Por que Drupal 7?
- Nodos e imaxes
- CCK
- Menús
- Módulos do core e opcionais
- Formularios
- Vistas
- Galería de imaxes
- SEO
- Xestión avanzada de usuarios
- Internacionalización
- Copias de seguridade
- Actualizacións
- Outros aspectos de mantemento
Estes seminarios forman parte da oferta formativa en software libre no CDTIC dentro do Plan de Acción en materia de Software Libre 2014.
