Os traballadores autónomos de Galiza poderán pedir axudas para a adquisición de computadores a partir do xoves 9 de outubro. Os equipos informáticos que adquiran, en virtude desta subvención, contarán con ferramentas ofimáticas de Software Libre de xeito gratuíto, con independencia de que dispoñan doutras aplicacións de pago que poidan interesar ao traballador.
Con este propósito a Dirección Xeral de Promoción Industrial e da Sociedade da Información da Consellaría de Innovación e Industria fixo entrega previamente ás entidades asinantes de dous CDs cos programas de instalación de Linux e aplicativos de software libre, así como dun DVD con ferramentas de xestión para PEMES. Con isto facilitouse o cumprimento das obrigas por parte dos comercios para a xestión desta liña de axudas.
A subvención, convocada pola Dirección Xeral vai dirixida a traballadores dados de alta no Réxime Especial da Seguridade Social, con domicilio e alta fiscal no IAE para a súa actividade económica en Galiza, agás os comerciantes retallistas, para os que xa existe unha liña de axudas específica.
A axuda acadará o 45% do investimento, cun límite máximo de 350 euros por solicitante. Non serán subvencionábeis a adquisición de licenzas de software adicional, outros periféricos ou outro tipo de dispositivos distintos do computador.
- Copia do DNI ou NIE, en vigor, no que deberá constar o enderezo dentro da Comunidade Autónoma de Galicia.
- Copia de documento de pago mensual á Seguridade Social do mes anterior á solicitude, do Réxime Especial de Traballadores Autónomos.
- Identificación, por declaración do solicitante, do epígrafe do IAE e localidade da Comunidade Autónoma de Galicia na que se atopa dado de alta censual no IAE.
- Exclusivamente para o caso de que o DNI ou NIE non acredite o domicilio dentro da Comunidade Autónoma de Galicia, deberá requirirse do solicitante a presentación de certificado expedido pola Axencia Estatal da Administración Tributaria no que figure o domicilio fiscal do solicitante. A antigüidade máxima deste certificado será de 3 meses.
