Este pasado venres anunciouse o lanzamento da versión 1.0, que leva por nome Greenway. Este aplicativo colle o seu nome do personaxe da obra de Tolkien O Señor dos Aneis, Bilbo Bulseiro, e tamén esta versión colle o seu nome desta saga: Greenway era o camiño que levaba de Minas Tirith a Fornost.
Entre as características deste cliente para a edición de blogs destacan:
- Un editor WYSIWYG completo, ademais dun editor HTML
- Previsualización da entrada co estilo do teu blog, como se estiveses a visitar o blog
- Compatibilidade coas API de Blogger1.0, MetaWeblog, MovableType (WordPress é compatíbel con todos estes) e Google GData (empregado nos blogs de blogspot.com)
- Capacidade para crear, modificar e eliminar entradas
- Capacidade para crear “borradores” e publicacións programadas
- Capacidade para subir ficheiros ao blog (só en API compatíbeis, como MetaWeblog e MovableType)
- Capacidade para recuperar as entradas recentes do blog
- Corrector ortográfico interno (empregando o corrector de KDE)
Nesta nova versión 1.0, só se engadiu unha nova característica: un sistema de caché das ligazóns empregadas, para usos posteriores. Os demais cambios foron arranxos de erros e melloras da versión Beta previa.
