A Linux Foundation, a organización sen ánimo de lucro adicada a acelerar o crecemento de Linux, anunciou o pasado martes día 8 que a empresa VIA Technoligies, Inc. se converteu no seu membro máis recente.
“VIA comparte o obxectivo da Linux Foundation de fomentar o crecemento do ecosistema de Linux”, declarou Richard Brown, vicepresidente de marketing de VIA Technologies, Inc. “Estamos a ver un novo impulso a Linux, particularmente no terreo dos móbiles, e estamos emocionados co potencial de Linux neste segmento. Estamos a investir uns recursos considerábeis para apoiar os desenvolvementos nesta área”.
A Linux Foundation é un consorcio sen ánimo de lucro adicado ao fomento do crecemento de Linux. Fundouse no 2007, e patrocina o traballo do creador de Linux, Linus Torvalds. Apóiana empresas líderes no campo de Linux e o código aberto de todo o mundo. A Linux Foundation promove, protexe e estandariza Linux, acollendo importantes grupos de traballo, e ventos e recursos en liña.
VIA é un coñecido fabricante de plataformas de procesadores x86 de baixo consumo de enerxía, moi empregados nos sectores dos PC, ultraportátiles, dispositivos empotrados… VIA xa amosara o seu interese no software libre, mantendo un portal de descargas para Linux, e traballando para asegurar a compatibilidade dos seus produtos fornecendo controladores, código fonte e documentación.
Fonte: Nota de prensa nun dos blogs da páxina da Linux Foundation
