O pasado mes de decembro publicábase WordPress 3.5 e esta semana, como podemos ver no portal de Trasno, grazas á comunidade de tradución de WordPress ao galego xa podemos desfrutar desta última versión na nosa lingua.
Como podemos ler na páxina da comunidade galega de WordPress, a tradución desta aplicativo á nosa lingua ten unha longa historia na que participaron moitas persoas ao longo do tempo, e que nas últimas versións vénse realizando a través de GlotPress, a ferramenta de tradución colaborativa de WordPress.
O núcleo de Worpress así como o novo tema Twenty-twelve están ao 100% en galego, mais a parte dos menús de administración e de administración de rede aínda non conseguiron superar o 75% da tradución polo que agradecen as achegas de todos aqueles interesados en poder empregar esta ferramenta integramente en galego. Para colaborar só é preciso rexistrarse no GlotPress cunha conta de usuario de WordPress e comezar a contribuír. É conveniente coordinarse co grupo de localización de WordPress ao galego.
As principais novidades de WordPress 3.5, de nome en clave Elvin, son a incorporación dun novo xestor multimedia cun completo redeseño máis sinxelo e intuitivo, ao que se lle dotou dunha maior axilidade e facilidade para a inserción e xestión de imaxes; un novo tema predeterminado, Twenty Twelve, máis simple, flexible e elegante deseñado especialmente para os dispositivos móbiles. Ademais trae numerosas melloras no panel de administración que agora está preparado para aproveitar a resolución das novas pantallas Retina, vén cunha nova páxina de benvida, mellora na accesibilidade nos lectores de pantalla, refinamento das páxinas de administración …
