A asociación Melisa, en colaboración cos compañeiros de ParnetTIC de Melide, organizan para este xoves 26 de maio, ás 11:00 horas, no telecentro do edificio multiusos de Melide, unha charla de achegamento ao Software Libre.
Na charla explicaranse brevemente os conceptos básicos para entender o movemento do código aberto, e expoñeranse algúns casos prácticos de como nos afecta na nosa vida cotián o uso deste tipo de software, por exemplo, á hora de comprar un ordenador.
A charla vai dirixida principalmente ao alumnado que está asistindo aso cursos organizados por ParnetTIC, aínda que está aberta a calquera persoa que queira participar nela.
Para aqueles que descoñezan a importante labor de promoción da tecnoloxía en xeral e do software libre en particular, que está a desenvolver esta asociación, principalmente na comarca de Melide, pode resultar moi interesante escoitar a participación de Rafael Rodríguez Gaioso, presidente da asociación, o pasado día 19 de maio nos estudos de Radio Melide para dar a coñecer a asociación, e as actividades que están a realizar en beneficio do software libre e da tecnoloxía en xeral.
Na súa páxina web é posible escoitar distintos cortes da entrevista na que se trataron temas como:
1 – Presentación de Melisa – Actividades
2 – O galego nas ferramentas informáticas
3 – Alternativas aos programas privativos
4 – Falamos do comunicado de Melisa
5 – O Software Libre na Escola
6 – Grupos galegos relacionados co software libre
7 – Reciclaxe e reutilización de equipos obsoletos
8 – Banda ancha no rural, administración publica
9 – Documentos accesibles e formatos abertos
Fonte: Melisa
