A asociación Inestable de Ordes organiza un barcamp de Arduino o vindeiro sábado día 5 de novembro, co que esta asociación da un novo paso na súa relación coa temática relacionada cos robots realizando unha introdución na filosofía do hardware libre da man de Arduino.
Así, o pasado ano realizou obradoiros de programación de robots con software libre coa plataforma LeJos, e este ano xa se achegou a Arduino cun relatorio nas VIII Xornadas de Software Libre de Ordes.
O vindeiro sábado 5 de Novembro durante todo o día (de 0:00 a 14:00 horas e de 16:00 a 21:00 horas) na Casa da Cultura de Ordes celebrarase unha xornada de introdución a Arduino co formato barcamp. Un Barcamp é unha reunión que xorde do desexo da xente de compartir e aprender nun ambiente aberto. Estrutúrase nu ambiente informal de forma que sexa posible a participación de xente con diversos perfís de coñecementos que sen a rixidez dun programa completamente pechado, poden intervir nas discusións, realizar demostracións, alentando en todo momento a interacción de todos os participantes.
Nesta ocasión cóntase coa presenza dos poñentes a Oscar González e a AlexTC de BricoGeek que exporán os seguintes temas:
- Introdución á electrónica
- Presentación da plataforma Arduino
- Montaxes típicas e iniciación á robótica
- Presentación e explicación do robot Orugas
- Comunicación sen fíos mediante Xbee
- Presentación de módulos de expansión e material diverso
Ao tratarse dunha xornada con formato barcamp, os temas non están pechados, polo que todo o que dispoña de experiencias que contar, proxectos que amosar … relacionados con Arduino será benvido.
Esta xornada forma parte das actividades que Inestable desenvolve ao abeiro do Convenio de Colaboración das AGUSL coa Secretaría Xeral de Modernización e Innovación Tecnolóxica da Xunta de Galicia incluído dentro do Plan de Acción FLOSS 2011.
