O equipo de TYPO3 ven de liberar a última versión do seu proxecto, a versión 4.1. TYPO3 é un sistema de xestión de contidos de propósito empresarial (Enterprise Content Management – ECM) baixo licenza GNU/GPL. Este ECM conta con múltiples funcionalidades, entre elas, a implementación de plantillas que se axeitan aos estándares e o sistema de control de versións.
Se a versión anterior estaba centrada na usabilidade a nivel do editor, esta nova versión trae melloras para os administradores e os desenvolvedores. As características máis destacables son: a edición de rexistros relacionais en liña (Inline Relational Record Editing – IRRE), ferramentas para administración por liña de comandos, funcionalidades Ajax na árbore de ficheiros e melloras no repositorio de extensións (Extensión Manager – TER).
TYPO3 4.1 inclúe melloras de rendemento no acceso a base de datos e no almacenamento de páxinas intermedias (page caching). Sitios TYPO3 que traballan en plataformas de aloxamento compartido con limitacións de memoria agradecerán estas novas características. Ademais destas melloras principais, a nova versión contén decenas de pequenas novas funcionalidades, melloras e erros solucionados. Esta versión está enfocada ao uso en tódolos aspectos do sistema, sendo obxectivo común para tódalas versións 4.x.
