O laboratorio tecnolóxico cidadán de Vigo será un dos centros formativos seleccionados para impartir o Fab Academy 2025, un programa de referencia mundial en fabricación dixital coordinado polo Centro de Bits e Átomos do Instituto Tecnolóxico de Massachusetts (MIT). Esta iniciativa, dirixida por Neil Gershenfeld, director do centro e pioneiro na filosofía de “facer (case) calquera cousa”, ofrece unha formación única no eido das tecnoloxías emerxentes.
O Fab Academy está deseñado para que os participantes aprendan a utilizar ferramentas de fabricación dixital como impresoras 3D, fresadoras CNC, cortadoras láser e cortadoras de vinilo, combinadas con coñecementos avanzados en electrónica e controladores robóticos como Arduino ou Raspberry Pi. O obxectivo é que os alumnos sexan capaces de prototipar e construír os seus propios dispositivos, resolvendo problemas específicos ou creando instalacións artísticas e sistemas integrados na Internet das Cousas (IoT).
A formación, que se desenvolve durante seis meses, está dirixida a enxeñeiros, deseñadores de produto, arquitectos e afeccionados ás tecnoloxías emergentes. As clases impártense en inglés e inclúen sesións presenciais por videoconferencia todos os mércores, nas que os alumnos presentan os seus avances. Aínda que é posible cursar o programa en remoto, é necesario ter certos coñecementos previos en electrónica e asistir ás sesións prácticas nos laboratorios locais.
Cada Fab Lab que participa no programa, como o de Vigo, actúa como un nodo dentro dunha rede global. Os estudantes asisten a conferencias en liña todos os mércores de 9:00 a 12:00 (hora do leste dos EE.UU.), que quedan gravadas para o seu posterior acceso. Ademais, dedican 2 ou 3 días á semana a sesións prácticas nos laboratorios locais, onde teñen acceso a equipos de fabricación dixital e reciben apoio persoal para os seus proxectos.
O programa comeza a mediados de xaneiro e ten unha duración de cinco meses de clases máis un mes de avaliacións. Os alumnos deben presentar un proxecto final en xuño, que será avaliado polo equipo docente do Fab Academy, composto por expertos de renome internacional.
Para matricularse no Fab Academy 2025, é necesario contactar con A Industriosa, o Fab Lab de Vigo, enviando un correo electrónico a directiva@aindustriosa.org. Para obter máis detalles sobre o programa, pódese consultar a páxina web oficial do Fab Academy en fabacademy.org.
