As emisoras públicas alemás ARD e ZDF lanzan unha iniciativa de software libre e crean unha filial conxunta para operar as súas bibliotecas de medios. Esta iniciativa pretende facer que compoñentes clave dos seus servizos de transmisión sexan accesibles ao público, fomentando a eficiencia, o interese público e a transparencia.
ARD e ZDF desenvolverán e utilizarán conxuntamente compoñentes clave dos seus servizos de streaming, incluíndo o reprodutor, o sistema de recomendacións e o sistema de deseño. Estes compoñentes publicaranse como código aberto, permitindo que outros provedores de servizos, incluíndo institucións culturais e plataformas nacionais e internacionais, se beneficien da súa tecnoloxía.
O Dr. Eckart Gaddum, xefe da Oficina Editorial Principal de Medios Dixitais de ZDF, destacou a natureza colaborativa do proxecto, afirmando:
“Estamos só ao comezo. Xunto con ARD, estamos comprometidos coa transparencia e co concepto de código aberto e, no futuro, ofreceremos compoñentes que tamén poderán ser utilizados por outros provedores, comerciais e non comerciais”.
Esta colaboración tamén reflicte o obxectivo máis amplo de posicionarse nun mercado cada vez máis competitivo.
O proxecto baséase en dous piares: o desenvolvemento das plataformas de streaming e a operación técnica conxunta da biblioteca de medios. Unha filial comercial conxunta encargaráse das operacións técnicas e da distribución IP, sendo ARD quen lidere esta unidade. Ademais, unha oficina conxunta, dirixida por ZDF, coordinará o desenvolvemento das bibliotecas de medios, representará o proxecto ante posibles socios e centrarase na compatibilidade e comunicación coa comunidade de código aberto. ARD e ZDF desenvolverán e publicarán gradualmente os compoñentes clave dos seus servizos de streaming conxuntamente.
A rede de transmisión pretende ofrecer acceso a un gran cosmos de contido, aproveitando un sistema de recomendación baseado en algoritmos públicos transparentes e un uso responsable dos datos.
