A Document Foundation presentou LibreOffice 25.2, a nova versión da súa suite ofimática libre dispoñible para Windows, macOS e GNU/Linux. Esta actualización incorpora melloras na interface de usuario, facendo que a experiencia sexa máis flexible e adaptada a diferentes hábitos de traballo. Tamén optimiza a accesibilidade, con novas opcións para usuarios con necesidades especiais.
A interoperabilidade reforzouse con melloras na compatibilidade con documentos en formato propietario OOXML (DOCX, XLSX e PPTX) e a incorporación do soporte para ODF 1.4. No apartado de seguridade, LibreOffice agora permite eliminar toda a información persoal dos documentos e facilita a sinatura dixital automática mediante certificados predefinidos.
Writer, Calc e Impress tamén recibiron novas funcións: melloras na xestión de cambios seguidos en documentos longos, unha nova ferramenta para detectar e eliminar rexistros duplicados en Calc, e optimizacións nos modelos de presentación en Impress.
LibreOffice 25.2 confirma a aposta por unha suite ofimática libre, con funcionalidades avanzadas e un forte compromiso coa privacidade dos usuarios. Pódese descargar de balde dende www.libreoffice.org.
