Linux gaña presenza no eido multimedia con dous novos produtos: Rosegarden e UbuntuStudio. O primeiro trátase dun editor de son dirixido a músicos amateurs e pequenos estudos de gravación que permite a composición e edición musical, unha ferramenta moi similar á aplicación propietaria Cubase. Pola súa banda UbuntuStudio é un interesante achegamento de Ubuntu a unha contorna multimedia.
Rosegarden vén avalada pola súa elección coma proxecto do mes de decembro por Sourceforge. Esta aplicación KDE contén un editor de notación, un estudio MIDI, mezclador… polo que constitúe un completo posto de traballo para o audio dixital. Para mostrarvos as posibilidades desta ferramenta os creadores teñen unha web con música feita co editor. Galicia aportou o seu gran de area xa que un dos responsables do proxecto, Pedro López-Cabanillas, é un galego residente en Barcelona.
UbuntuStudio, pola súa banda, é un proxecto orientado a Gnome que ten coma propósito final crear unha distro orientada á edición de contidos multimedia. Está prevista a súa saída en abril.
