Autor: Alberto

Logo da compra de ATI por parte de AMD, comezan a ser visibles os primeiros resultados. En primeiro lugar, ATI vai publicar a vindeira semana o novo controlador para GNU/Linux das súas tarxetas que, polo que semella, vai mellorar en moito o desempeño do anterior controlador. Ademais rumoréase que ATI pode estar pensando en liberar as especificacións das súas tarxetas, que proporcionaría un controlador libre con soporte para dous dimensións e coas funcións básicas para que o soporte de tres dimensións sexa creado pola comunidade mentres ATI continuaría co seu controlador privativo. Se estas dúas novas fanse realidade, GNU/Linux e o resto de sistemas operativos libres avanzarán nun campo especialmente importante nestes momentos…

Fontes:

The Inquirer
lwn.net

A Consellería de Innovación e Industria asinará un convenio de colaboración coa Asociación de Enxeñeiros de Telecomunicación de Galicia (AETG) para a realización do Dicionario Enciclopédico Galego das TIC, que incluirá os termos e definicións conceptuais referentes ás Tecnoloxías da Información e das Comunicacións. Esta ferramenta terá unha gran importancia á hora de consolidar un vocabulario para a adaptación de ferramentas libres ao galego.

O proxecto contará coa colaboración técnica e científica da Escola Superior de Enxeñeiros de Telecomunicación de Vigo e a colaboración lingüística da Real Academia Galega.

A Rede de Dinamización da Sociedade da Información e os concellos do Porriño e de Salceda de Caselas, en colaboración con Mancomun.org, acollerán o curso de Bases de Datos que será impartido no Centro Neural do Centro Multiusos de Torneiros do Porriño en horario de 20:00 a 23:00 horas entre os días 10 e 26 deste mes.

O obxectivo que se pretende acadar é que as persoas asistentes adquiran coñecementos de nivel avanzado na creación e xestión de Bases de Datos co OpenOffice.org Base. Farase especial fincapé no emprego do Software Libre como unha alternativa válida e eficaz ao software privativo.

Unha reportaxe do diario El Pais cóntanos como a ONG nixeriana Fantsuam Foundation fabrica os seus propios computadores que serven para achegar a sociedade da información á poboación rural do país africano. Estes equipos funcionan baixo GNU/Linux e aplicacións libres empregando enerxía solar para o seu funcionamento.

O Solo Computer resiste as difíciles condicións de calor e po da zona contén unha pantalla LCD e electrónica encastadas nun marco de madeira procedente de bosques reforestados da zona. É un produto da empresa inglesa Exp LAN.

O Software Libre permite ademais dar resposta ás necesidades lingüísticas de Nixeria a través da localizacións de programas libres.

A Asociación de Empresarios de O Ceao dentro do programa Rede de Dinamización da Consellaría de Innovación e Industria continúa no mes de setembro coas cápsulas tecnolóxicas, pequenos cursos gratuítos relacionados con Internet dirixidos a todos os traballadores e empresarios do polígono industrial de O Ceao. O obxectivo das cápsulas tecnolóxicas é acercar as novas tecnoloxías aos traballadores e empresarios de O Ceao a través de cursos de curta duración co obxectivo de optimizar o seu tempo e que poidan asistir a unha ou a todas segundo as súas necesidades.

A continuación detállanse as datas dos 11 eventos xunto cun breve resumo de cada unha das cápsulas tecnolóxicas. Todos os cursos terán unha duración de 2 horas e terán lugar de 20:00 a 22:00 h (a non ser que se indique o contrario):

Mellora a navegación por Internet: Mozilla Firefox e Mozilla Thunderbird
Data: luns 10 de setembro de 2007.
Contido: Optimiza a navegación por Internet. Melloras que nos ofrecen outros navegadores. Alternativas ao Internet Explorer e Outlook Express.

Correo electrónico: como combater o correo lixo
Data: martes 11 de setembro de 2007
Contido: Que é o correo lixo? Por que nos chega correo lixo? Ferramentas para combatelo. Ligazóns de interese.

Para ver todos o programa premendo en ler máis ou na seguinte ligazón: Programa cápsulas tecnolóxicas setembro [PDF]

Por que é importante que a miña empresa teña páxina web?
Data: mércores 19 de setembro de 2007
Contido: Conceptos de páxina web. Vantaxes e beneficios de que a miña empresa teña páxina web. Pasos a seguir á hora de desenvolver un proxecto web. Principais características da páxina web. Recursos para ter a miña propia web gratis.

Sinatura dixital e facturación electrónica
Data: xoves 20 de setembro de 2007
Contido: Que é a sinatura dixital? Para que me serve? Crea a túa propia sinatura dixital. Que é a facturación electrónica? Beneficios da facturación electrónica.

Fotografía dixital. Retoca as túas fotos
Data: luns 24 de setembro de 2007
Contido: Conceptos da fotografía dixital. Como retocar as túas propias fotografías. Programas e enderezos de interese.

Crea a túa propia cápsula. Ven, pregunta e resolve as túas dúbidas
Data: xoves 26 de xullo de 2007
Horario: 20:00 a 22:00
Duración: 2 horas.
Contido: Ven e resolve as túas dúbidas relacionadas con Internet ou as novas tecnoloxías. Ven e pregunta.

OpenOffice.org. Procesador de textos, folla de cálculo, presentacións e outro software ofimático
Data: mércores 26 e xoves 27 de setembro de 2007
Horario: 20:00 a 22:00
Duración: 4 horas.
Lugar: Centro de Empresas e Innovación. Avda. Coruña, 490. Lugo.
Contido: Coñecer o OpenOffice.org. Explorar as posibilidades de OpenOffice. Valorar as posibilidades de migrar dende Microsoft Office.

Fonte orixinal da nova:
http://dinamiza.sociedadedainformacion.eu

Páxina oficial: http://geotools.codehaus.org/

DistroWatch non pode ser considerado como medidor do índice de uso de calquera distribución Linux, mais si é o sitio máis importante para saber a cantidade de descargas que se fan a través da internet da maioría de distribucións Linux. De aí que chame a atención que PCLinuxOS desbancase a Ubuntu do liderado en DistroWatch.

Varios anos estivo Ubuntu en primeiro lugar e rematou cos liderados de Mandrake, OpenSuSE e, repentinamente, de Fedora, a herdeira de Red Hat.

Os paquetes de PCLinuxOS foron creados por un desenvolvedor texano coñecido como «Texstar», quen traballou para Mandrake.

Algúns dos puntos a favor que nos ofrece esta distribución de paquetería RPM son o apt-get como xestor de software por defecto e Synaptic. É descendente de Mandrake mais sen os seus defectos de estabilidade e con paquetes de Red Hat. Para alén diso, se a tarxeta gráfica o admite, poder activar Beryl ou Compiz dunha forma moi sinxela.

Fonte:
http://bakara.wordpress.com/

O ISO/IEC DIS 29500 foi publicado como estándar ECMA-376 e enviado en decembro de 2006 ao ISO/IEC JTC 1 para a súa adopción como estándar seguindo o procedemento rápido (fast-track). Este procedemento consiste na revisión durante un mes polos 41 comités nacionais do JTC1, comité técnico da ISO para as tecnoloxías da información, e despois unha votación durante 5 meses aberta a todos os comités nacionais do ISO e o IEC, un total de 104 países.

A aprobación precisaba que polo menos 2/3 dos votos dos membros do ISO/IEC JTC 1 foran positivos e que non houbera máis de 1/4 de votos negativos do total dos países participantes. Ningún destes criterios foi acadado pois só o 53% dos membros do JTC1 votou a favor e o 26% do total foron negativos.

En febreiro de 2008, na cidade suíza de Geneva, o subcomité do ISO/IEC JTC 1 (SC 34 , Document description and processing languages) organizará unha reunión de resolución da votación (BRM). O obxectivo desta reunión será revisar e buscar consenso nas posibles modificación ao documento ao abeiro dos comentarios recibidos acompañando aos votos. Se estas modificacións propostas son suficientes para que os comités nacionais varíen os seus votos negativos e con isto se cumpren os criterios arriba descritos procederíase á publicación do estándar.

Doutro modo, a proposición fracasaría e remataría este procedemento rápido de aprobación. Esto non excluiría que se reenviase seguindo o procedemento normal para o desenvolvemento de estándares ISO.

Fonte: Nota de prensa da ISO 

Dous departamentos do concello de Amsterdam investirán unha cantidade cercana aos 400.000 dólares na avaliación do emprego de escritorios Linux. A capital holandesa busca reducir custos e superar o monopolio do provedor polo que avalía diferentes alternativas. Ademais de Amsterdam outras nove cidades dos Países Baixos como Eindohven ou Groningen tamén poderían migrar parcialmente a sistemas libres.

O goberno da rexión alemana de Renania do Norte-Westfalia vén de chegar a un acordo con Novell para instalar as súas distribucións de GNU/Linux en 33 universidades do seu territorio. Deste xeito un 40% dos universitarios alemáns, máis de 800.000 estudantes, das rexións de Renania, Baviera e Turinxia terán acceso a este sistema operativo baixo o soporte de Novell.