Autor: Alberto

«Open Document Format» (ODF), o estándar ISO aprobado para os documentos electrónicos, foi convertido en estándar en Lituania o 31 de xullo. O Comité Lituano de Estándares publicou recentemente a decisión sobre ODF no seu sitio web.

«A aprobación do ODF é un paso cara a unha sociedade da información segura e aberta», comentou nunha declaración a organización lituana de código aberto «Atviras kodas Lietuva» (AKL)…

«O ODF axuda a garantir a neutralidade tecnolóxica e traerá beneficios económicos ao país», dixeron os defensores do código aberto. Ao aprobar o ODF para o seu uso polo goberno, faise máis fácil para a xente seleccionar calquera dos paquetes ofimáticos distribuídos gratuitamente e de código aberto, como o OpenOffice.org ou o AbiWord. ODF está admitido ademais por aplicacións ofimáticas privativas tales como o Workplace de IBM e o software de procesado de texto en liña de Google Writely.

AKL foi partidaria da adopción do ODF e salientou a súa importancia no uso gobernamental.

O grupo agarda que as institucións gobernamentais prefiran ODF sobre outros formatos.

Fonte:
IDABC

A sección de novas de GIMP infórmanos que a versión estable de GIMP 2.4.0 está a piques de saír. Os desenvolvedores de GIMP xa publicaron unha primeira versión candidata da nova versión de GIMP 2.4.0. Isto marca o fin do ciclo de desenvolvemento quedando as novas características finalizadas e a API conxelada, inda quedando por corrixir algúns “bugs” e outros cambios pendentes de menor importancia.

Dende a web anímase a colaborar no “testing” desta versión 2.4.0-RC1 estando dispoñible para a súa descarga dende o ftp de GIMP.

Fonte: GIMP  

Xa está publicado na nosa sección de descargas o 6º informe de políticas e iniciativas da UDC, no marco do convenio asinado con mancomun.org, que comprende o período de maio-xullo do 2007.

Este documento, que forma parte dos traballos editados polo Observatorio de Software Libre de Galicia, fai unha análise das principais políticas e iniciativas no eido do Software Libre do período que vai de maio de 2007 a xullo de 2007.

Xa pasaron 10 anos desde que un 15 de agosto do ano 97 Miguel De Icaza dixese: «Queremos desenvolver un conxunto completo e libre de aplicacións amigables e de ferramentas de escritorio, similares a CDE e KDE mais baseadas completamente en Software Libre». Foi daquela cando naceu GNU Network Object Model Enviroment, máis coñecido como GNOME.

Desde entón, foi evolucionando xunto con KDE a unha grande velocidade, a aprenderen un do outro até chegar na actualidade a ser un dos mellores contornos de escritorio que podemos achar…

Fonte:
DosBit

O servizo de FTP da Universidade da Coruña (UDC) xa é réplica oficial do coñecido paquete ofimático OpenOffice.org.

Con esta nova incorporación, a UDC amplía o seu catálogo de programas de Software libre que pon á disposición da comunidade a través do seu FTP público e a que cede parte do seu largo de banda. Deste xeito, tanto a comunidade universitaria, en particular, como toda Galiza, en xeral, contan cunha réplica próxima de que baixar os programas máis rapidamente.

Para alén do anterior, a UDC está a apostar polo OpenOffice.org a nivel administrativo como paquete ofimático para o manexo dos ficheiros no formato estándar ODT. Neste marco, a UDC distribuíu, recentemente, entre o seu persoal de administración e servizos uns CD de OpenOffice.org en galego, adaptados por Mancomun.org.

Como pode verse no URL http://distribution.openoffice.org/mirrors, a UDC é a segunda réplica oficial española en acadar a «categoría un», e a primeira galega.
 

A nova tamén na Oficina de Software Libre da Universidade da Coruña

Unha das melloras que xa está incorporada no código do Firefox 3 é o xestor de descargas.

A primeira vista o principal cambio é que as descargas estan organizadas en activas e inactivas (completada ou cancelada) de modo que resulte máis sinxelo ver o que está a ocorrer. Outro cambio foi a modificación dos textos coas ligazóns de “pause” e “cancel” sendo substituídas polas iconas de “pause” e “stop” para un recoñecemento máis rápido.

As descargas rematas contan cunha icona de información que amosa os detalles incluíndo a hora de finalización, o enderezo da descarga e a ubicación no sistema de ficheiros. As descargas canceladas teñen unha icona de recomprobación, mentres que as descargas finalizadas teñen unha icona para abrir o ficheiro descargado.

O xestor conta cunha función de busca para procurar os ficheiros desexados por medio dun cadro de texto.

Outros cambios xa se estan a fornar, por exemplo, amosar información adicional na barra de estado, nun panel lateral ou incluso na barra de títulos.

Fonte: Mozilla Links

OpenBlueLab é un proxecto que ten coma obxectivo desenvolver un ERP web completo dende cero. A peculiaridade deste ERP é que os compoñentes da interface de usuario, os formularios e as interaccións [[Ajax]] do portal constrúense ao voo a partires do modelado UML que describe o sistema de información. Os compoñentes da interface de usuario xéranse dinamicamente, facendo que os datos se cumprimenten sen a necesidade de codificar calquera interacción coa base de datos.

A partires dun modelo UML en formato XMI os xeradores MDA (Model-driven architecture, Arquitectura Conducida polo Modelo) constrúen todos os ficheiros.

MDA é unha metodoloxía de deseño software proposta polo OMG. A idea é que o modelado e definición do sistema se manteña, chegando a un elevado nivel de detalle, sen se decantar por unha linguaxe de programación específica nin por unha plataforma de uso concreta, coas vantaxes asociadas a tal independencia de plataforma e linguaxe. A tradución posterior desta definición MDA a unha plataforma e/ou linguaxe específica faise normalmente con ferramentas automáticas de tradución (xeradores).

Proceso de automatización empregando AndroMDA 

Este marco permite centrarse no deseño do sistema de información, xa que os formularios e a arquitectura do portal son xerados automaticamente.

OpenBlueLab é unha solución alternativa, baixo licenza (GNU/GPL), aos principais ERP privativos e está dispoñible para descarga desde a páxina do proxecto e tamén en sourceforge.

A Linux Desktop Survey é unha votación/enquisa que pretende recoller datos do uso de computadores con GNU/Linux.

Para iso hai que contestar a unha serie de preguntas como que tipo de distribucións usamos frecuentemente, que contornos de escritorio ou que navegadores web.

Os datos polo de momento indican que a distribución de GNU/Linux máis usada é Ubuntu cun 32,2 % dos votos… 

Nos contornos de ventás hai unha dura competencia entre Gnome (37,1%) e KDE (43%). Nos navegadores hai un claro líder que é o Firefox co 59,1%.

Os resultados actuais pódense ver na seguinte ligazón:
Resultados momentáneos da Linux Desktop Survey 2007

Os resultados definitivos da votación do 2006:
Linux Desktop Survey 2006

Fonte:
DesktopLinux.com

A primeira versión oficial de Compiz Fusion acaba de ser lanzada (notas do lanzamento). Este é o resultado de seis meses de traballo sobre Compiz Fusion. A primeira versión estable que será a 0.6.0 saíra despois da versión 0.6.0 de Compiz. Fai uns días tamén se comunicaba a elección do logo oficial de Compiz Fusion despois dun proceso de votación.

Compiz Fusion é o resultado da unión de partes do proxecto Beryl coa comunidade de complementos (plugins) de Compiz. Estas dúas comunidades xuntáronse para crear un produto para GNU/Linux que implementa un dos mellores escritorios 3D actuais…

A unión entre Compiz e Beryl, combinado co continuo incremento na estabilidade, fiabilidade e usabilidade en Compiz e un mellor soporte de drivers farán que Compiz Fusion esté incluído por defecto en moitas distribucións facendo moito máis sinxelo o uso do mesmo.

Pódese descargar Compiz Fusion 0.5.2 desde:
http://releases.compiz-fusion.org/0.5.2

O Concello do Pereiro de Aguiar está a desenvolver un estudo para avaliar a implantación da banda larga sen fíos. Esta iniciativa xurdiu coa finalidade de favorecer a integración dos seus veciños na Sociedade da Información e promover a xeneralización do uso das novas tecnoloxías e das comunicacións, dinamizando o desenvolvemento social do municipio e contribuíndo a eliminación da fenda dixital.

Este proxecto e as xestións relacionadas coa CMT (Comisión del Mercado de las Telecomunicaciones, organismo que xestiona as telecomunicacións en España), estase a levar a cabo pola empresa ourensán Redegal S.L. xunto coa Escola Superior de Enxeñería Informática do Campus de Ourense – Universidade de Vigo, nun proxecto I+D+i dirixido por Javier Rodeiro Iglesias e Miguel Díaz-Cacho Medina. Para a implantación e xestión do mesmo, empregarase Software Libre, pola fiabilidade e seguridade que aporta, evitando, ao mesmo tempo, os custos derivados do software privativo.

No estudo inclúense as análises topográficas con probas de campo, estudo da rede lóxica, términos legais e estudo de saúde.

Con esta nova iniciativa o Concello trata de continuar coa aposta tecnolóxica que se comezou a desenvolver hai dous anos, coa creación do portal web, onde se poden consultar as actividades que se realizan, os servizos que se prestan, o patrimonio do Concello do Pereiro de Aguiar, e outros servizos.

O fabricante de automóbiles francés «Peugeot Citroën» fará unha das migracións máis grandes a sistemas operativos con Software Libre para os seus computadores de escritorio, dos cales migrará uns 20.000, e tamén mercou o soporte para 2.500 servidores.

Peugeot converterá 20.000 dos seus 72.000 usuarios en GNU/Linux, para o que empregará a distribución Novell GNU/Linux SuSE Enteprise Desktop. O paquete tamén inclúe a versión 2 de OpenOffice.org modificada por Novell que garante a compatibilidade co formato de Microsoft Office. Tanto os computadores de usuario como os servidores terán que integrarse nunha infraestrutura Windows típica, incluíndo Active Directory e Microsoft Office…

Segundo parece, a migración segue aínda na fase inicial de formulación mais o seu proceso comezará axiña, segundo palabras de Guy Lunardi, directivo de Novell.Ao mesmo tempo, Lunardi salientou que o novo equipamento non requirirá clases de adaptación para o persoal agás por un pequeno folleto onde se recollen as principais diferenzas entre os sistemas.

Peugeot esta a programar o emprego das estacións con GNU/Linux nunha ampla variedade de áreas que van desde a manufacturación até as vendas.

Esta compañía xa completara un proxecto piloto para 300 usuarios baseado en Mandriva GNU/Linux, distribución dunha empresa francesa empregada actualmente no Ministerio de Agricultura e Pesca francés. No entanto, Lundardi non explicou o porqué do cambio de Madriva a Novell SuSE.

Máis información na fonte da nova:
InformationWeek