Autor: Alberto

Dende a web de WorldLabel están dispoñibles modelos (templates) de etiquetas para OpenOffice. Os modelos están dispoñibles en formato .stw e .ott, para as versión 1.1x e 2.0. Os modelos inclúen deseños de etiquetas para distribución (mailing), CD, mini CD, DVD, VHS, disquete e máis. Estes documentos están en formato aberto XML (ODF), con licenza GNU/GLP.

Dende a mesma web tamén se atopan dispoñibles varios modelos en formato SVG. Estes modelos pódense visualizar directamente nun navegador como Firefox, Opera ou outros. SVG é un formato vectorial co cal pódese ampliar ou reducir o deseño sen perder calidade. Os modelos de SVG foron creados empregando Inkscape.org e pódense abrir e corrixir co programa. Outro software como OpenOffice Draw, GIMP, Amaya ou Sketsa pode ser empregado para modificar os ficheiros SVG.

Estes modelos, xunto co Openoffice.org e a biblioteca de OpenClipart.org, permiten unha solución aberta para a creación etiquetas.

A través da web de AGNIX chéganos  o anuncio da dispoñibilidade das novas licenzas Creative Commons 3.0 que se diferencian respecto das anteriores nalgúns aspectos importantes:

• Separación da licenza xenérica da licenza norteamericana, creando unha nova que será coñecida como unported.
• Harmonización do trato dos dereitos morais e recompilación dos royalties da sociedade
• Sen linguaxe de endoso, pasando dunha situación de requirimento implícito a outro explícito. Máis información aquí.
• BY-SA con estrutura de compatibilidade agora incluída. Máis  información aquí.
• Aclaracións negociadas con Debian e MIT.

Fonte orixinal: Weblog de Creative Commons

GPUL, “Grupo de Programadores y Usuarios de Linux”, fai un chamamento para comezar os preparativos para a celebración, un ano máis, das tradicionais “Jornadas de Software Libre de GPUL”. Este ano é a sétima edición.

As xornadas celebraranse, en principio e se non hai cambios, a semana do 23 ao 27 de abril de 2007, e calquera persoa interesada en dar un relatorio, taller, titorial ou en organizar algunha actividade non ten máis que enviar unha proposta á dirección de correo info (ARROBA) gpul (PUNTO) org antes do 31 de marzo…

Na proposta hai que incluír un título para a actividade, quen a organiza e un pequeno resumo da mesma. Asemade hai que poñer as preferencias de días e horas, así como calquera restrición que se teña.

En principio o programa das xornadas debería estar pechado antes do mes de abril, por iso a data tope para propor unha charla é o sábado 31 de marzo.

Máis información na páxina de GPUL

Spread Firefox organiza un concurso para promocionar a capacidade de Firefox de incorporar funcionalidades utilizando os complementos (add-ons). Se utilizas ou coñeces algún interesante e queres compartilo cos demais podes participar enviando unha descrición do complemento. O concurso durará ata o 1 de abril.

O equipo de KOffice publicou KOffice 1.6.2, a segunda versión de corrección de erros na súa serie 1.6. Aínda que é unha versión de mantemento, hai algunhas novas características en Krita (novos filtros e operación de emborroado) e en Kexi (un novo Modelo de Usuario para despregar aplicacións Kexi), corrixíronse moitos erros, grazas á amable achega dos usuarios. Tamén se actualizaron os paquetes de idiomas con non menos de catro novas linguaxes…

O rexistro de cambios completo está dispoñible en:
http://www.koffice.org/announcements/changelog-1.6.2.php

Actualmente pódense descargar os paquetes binarios para Kubuntu e SUSE.

Fonte: 
http://www.kdehispano.org/node/3601

OpenStreetMap (OSM) é un proxecto colaborativo para xerar mapas libres empregando datos de dispositivos GPS móbiles. OpenStreetMap leva a idea dos wikis ao mundo dos mapas permitindo xerar e proporcionar datos xeográficos libres tales como rueiros a calquera persoa que o desexe. O proxecto comezou porque a maioría dos mapas teñen realmente restricións legais para o seu uso ou das súas API. Calquera persoa pode corrixir o mapa actual empregando as ferramentas dispoñibles, como único requirimento é crear unha conta no wiki.

Ferramentas para traballar con OSM:

• Applet de edición (Applet Java)
• JOSM (Programa Java Desktop)
• osm-editor (Programa Desktop Qt)
• Outras

A licenza de OSM é Creative Commons Attribution-ShareAlike 2.0 license para os datos e GNU GPL para o software.

A DudesConf ten por obxectivo reunir aos desenvolvedores do proxecto [[Debian]] GNU/Linux e as súas distribucións derivadas para colaborar xuntos no desenvolvemento da distribución e intercambiar opinións sobre a  marcha do proxecto. Terá lugar do día 13 ao día 15 de abril na Coruña hospedada polo GPUL, grupo de programadores e usuarios de Linux da Coruña.

Por segundo ano dende AULUSC e coa colaboración da ETSE, celébranse as Xornadas DescubreLinux07 para aqueles que estean interesados en inscribirse en dar os primeiros pasos con GNU/Linux. O obxectivo desta actividade é facilitar a iniciación no uso de tanto dos sistemas operativos coma das aplicacións libres. Estas xornadas comezan o día 1 de marzo e rematan o día 29.

Acaba de saír á luz a versión 1.00 do software Anjelica (con J de Java) orientado á xestión de empresas cárnicas.

O software foi desenvolvido durante os últimos catro anos, pero segundo o autor “Aínda faltan multitude de consultas, listados, estatísticas e aplicacións que se poderían desenvolver. Moitos módulos que se poderían implementar e/ou mellorar, pero Anjelica é estable e funcional.

Con Anjelica poderá realizar os seus pedidos de ventas e compras, emitir os  seus albarás e facturas, controlar o almacén, levar o control dos pagos e cobros pendentes,etc.

Pero o que diferencia a Anjelica doutros programas de xestión é que está pensado para ser usado nas empresas onde se necesite levar a trazabilidade dos seus produtos…

Máis información na páxina oficial do proxecto:

http://anjelica.sourceforge.net