Cantas veces acabaches enredado en correos interminables intentando atopar un día que lle veña ben a todo o mundo? Framadate é a resposta: unha ferramenta gratuíta e libre que che permite coordinar datas e recoller opinións en grupo de forma rápida e sinxela, sen necesidade de crear ningunha conta.
Que é Framadate?
Framadate é un servizo en liña creado por Framasoft, unha organización francesa sen ánimo de lucro que leva desde 2004 traballando pola soberanía dixital e o software libre. A ferramenta permite crear dous tipos de consultas:
- Enquisas para atopar data: propós varios días e horas posibles para unha reunión e as persoas participantes votan as que lles veñen ben. Ao final, verás de golpe cal é a opción que encaixa con máis xente.
- Enquisas de opinión: para cando non se trata de escoller unha data, senón de decidir entre varias alternativas (por exemplo, que tema tratar nunha xornada, que nome poñerlle a un proxecto ou onde comer coa xente do traballo).
O funcionamento é moi directo: créase a enquisa, compártese a ligazón coas persoas que van participar e cada quen vota desde o seu navegador. Sen descargas, sen rexistros, sen publicidade.
Por que usar Framadate?
- É completamente gratuíta e mantense grazas a doazóns. Non hai anuncios nin rastros publicitarios.
- Non recolle os teus datos: Framasoft ten un compromiso explícito co respecto á privacidade. A ferramenta existe para servir á persoa usuaria, non ao revés.
- Non fai falta crear ningunha conta: abonda con ter un navegador con JavaScript activado.
- O código é aberto: calquera pode revisar como funciona por dentro, organizacións e administracións poden instalar a súa propia instancia se queren ter un control total dos seus datos. Pódese descargar e usar en servidores propios.
- Funciona en calquera dispositivo: móbiles, tabletas e ordenadores de escritorio. Esta era, de feito, unha das melloras máis esperadas, e xa está dispoñible.
As novidades que chegaron en 2026
A principios de abril de 2026, Framadate estrenou unha versión completamente renovada. Estes son os cambios máis salientables:
Podes modificar o teu voto sen problema
Antes, se querías cambiar a túa resposta despois de enviala, necesitabas gardar un enlace especial. Agora xa non: mentres uses o mesmo navegador, a ferramenta recoñécete e permíteche editar o teu voto cando queiras. A persoa administradora da enquisa tamén pode activar a opción de que calquera poida modificar calquera voto, útil cando hai confianza entre as persoas participantes.
Podes desmarcar unha opción por accidente
Anteriormente, se marcabas algo sen querer, non había forma sinxela de desfacelo. Agora abonda con premer de novo na opción para desmarcala. Pequeno cambio, gran alivio.
Os nomes teñen que ser únicos
Para evitar confusións nos resultados, a nova versión non permite que dúas persoas se identifiquen co mesmo nome nunha enquisa. Así queda todo máis claro e ordenado.
A interface mellorou notablemente
En enquisas con moita participación, a fila cos teus votos queda fixada en pantalla para que non a perdas de vista mentres fas scroll. Ademais, agora véxase mellor cando hai máis opcións fóra da pantalla, e toda a zona de votación —o nome, as opcións e o botón de enviar— está agrupada de forma máis clara e visual.
Novos prazos para as enquisas
As enquisas caducadas elimínanse automaticamente aos 6 meses do vencemento. Os borradores sen completar bórranse ao mes. Así mantense o servizo máis limpo e ordenado.
O que está a chegar proximamente
O equipo de Framasoft traballa en novas funcionalidades para os próximos meses:
- Compartir por correo electrónico con mensaxes preformatadas listas para enviar.
- Xeración de códigos QR para facilitar a difusión das enquisas en eventos presenciais.
A transición á nova versión
Desde o 2 de abril de 2026 xa non é posible crear novas enquisas na versión antiga. As enquisas existentes nesa versión seguirán accesibles ata setembro de 2026, data na que se pecharán definitivamente. Se tes algunha enquisa activa na versión antiga, é un bo momento para revísala ou migrar o que necesites.
Como empezar
Entras en framadate.org, escolles o tipo de enquisa que queres crear, engades as opcións ou datas, e xa tes a ligazón para compartir. Todo en menos dun minuto.
Se a túa organización prefire ter o control total dos datos, podes descargar o código e instalar Framadate nun servidor propio. Tamén existen instancias públicas alternativas, como poll.disroot.org.
Framadate está dispoñible baixo licenza GNU AGPL v3.
Máis información en framadate.org e no Catálogo de ferramentas de Mancomún.
Información e imaxes obtidas de Framablog.
