Dous españois lideraron un proxecto internacional que concluíu co desenvolvemento dun computador portátil lixeiro que combina a utilización de software libre co respecto ao medio, grazas ao uso de enerxías renovábeis e á súa construción en plástico biodegradábel.
Ángel Blázquez, empresario do sector informático, e Pablo Machón, membro destacado da comunidade de software libre e presidente da Fundación Coñecemento Libre, son os responsábeis deste "miniordenador", que pesa 700 gramos e que funciona cunha carga baseada en placas solares, as cales permiten prolongar a duración da batería e acadar un funcionamento autónomo.
O computador incorpora un sistema completo de GNU/Linux con máis de 5.000 programas, debido á aposta da empresa fabricante -iUnika- por incorporar o software libre en todos os seus produtos.
Este equipo porase á venda durante o mes de xuño a un prezo que rondará os 130 euros, unha cifra que segundo os seus creadores é a clave para que este tipo de produtos consigan un oco no mercado, xa que "hai outros computadores fabricados en bioplástico pero que custan 10 veces máis, e cunha venda de poucas unidades non conseguen un impacto real".
Por outra banda, a mobilidade do mini-PC conséguese mediante conectividade GSM (Groupe Spécial Mobile), o sistema estándar global para as comunicacións móbiles.
A empresa fabricante aposta polo software libre
"iUnika é o primeiro fabricante de hardware que se comprometeu a empregar exclusivamente software libre en todos os seus produtos", explicou o presidente da Fundación Coñecemento Libre, Pablo Machón. Esta organización está comprometida co uso libre do coñecemento, o software e os estándares.
O equipo de iUnika está ubicado en España, China e Hong Kong, e ten acordos con distribuidores de todo o mundo. Machón explicou que as decisións sobre deseño de materiais e de software tomáronse en España pero que "o desenvolvemento dalgúns materiais como o bioplástico realizouse en China pola eficiencia dos fabricantes".
Fonte: EuropaPress, El Mundo
