No portal da administración electrónica veñen de anunciar a publicación por parte do Ministerio de Facenda e Función Pública o código fonte de datos.gob.es baixo licenza GPL e AGPL.
O proxecto datos.gob.es é unha ferramenta de xestión de contidos orientada á reutilización e publicación de datos abertos. Esta plataforma estase a empregar para a xestión do Catálogo Nacional de Datos Abertos, ofrecendo este un punto de acceso único ao conxunto de datos dos distintos niveis da administración.
A solución final combina diferentes compoñentes e tecnoloxías libres como son Apache Solr, CKAN, Drupal, PostgreSQL, MySQL, Elda, Varnish cache. Para máis información sobre as tecnoloxías que emprega a plataforma podes consultar a páxina do proxecto, tamén podes consultar o código fonte, que está dispoñible en GitHub.