TrueCrypt (Free Open-Source Disk Encryption Software) é un software para cifrar e agochar no teu computador datos que o usuario considere reservados empregando diferentes algoritmos de cifrado como AES, Blowfish, CAST5, Serpent, Triple DES e Twofish ou unha mistura dos mesmos.
Existen versións para sistemas operativos GNU/Linux e Windows.
O cifrado directo (on-the-fly-encrypted) significa que os datos son cifrados ou descifrados automaticamente antes de que sexan precisos, sen ningún tipo de intervención do usuario. Non é posible recuperar os datos se non se proporciona o contrasinal correcto ou os ficheiros chave axeitados (keyfile). Outra característica é que TrueCrypt cifra o sistema de ficheiros completo (nomes de ficheiro, cartafois, contidos, espazo libre, metadatos, …). Os ficheiros son descifrados directamente en memoria RAM mentres se está lendo ou copiando dunha partición cifrada con TrueCrypt, sen empregar en ningún momento o disco como almacenamento intermedio.
TrueCrypt ten unha licenza propia (TrueCrypt Collective License Version 1.0) que ven sendo unha recompilación das distintas licenzas dos algoritmos de cifrado.
