A asociación francesa Framasoft, coñecida por proxectos como PeerTube e pola súa campaña “Dégooglisons Internet”, presentou Framaspace, un novo servizo de nube colaborativa pensado especificamente para asociacións e colectivos activistas.
Que ofrece Framaspace?
Framaspace é un espazo de traballo en liña, accesible desde ordenador ou móbil, que permite ao colectivo que o use xestionar en conxunto:
- Ficheiros de calquera tipo, cos que se poden compartir con outras persoas.
- Axendas, tanto públicas coma privadas.
- Contactos, sincronizables co teléfono móbil.
- Fotos, organizables en álbums compartidos.
- Proxectos, mediante a metodoloxía Kanban (taboleiros de tarefas).
- Documentación en formato wiki.
- Videochamadas, para grupos de ata unha decena de persoas.
- Edición colaborativa de documentos de oficina (textos, follas de cálculo, presentacións), en tempo real e entre varias persoas.
Toda esta funcionalidade descansa sobre Nextcloud, un software libre moi coñecido e usado por millóns de persoas en todo o mundo, licenciado baixo a GNU AGPL v3. Isto significa que calquera pode estudar, verificar e mesmo instalar por conta propia o código que fai funcionar Framaspace.
A quen vai dirixido?
De momento, o servizo está reservado en exclusiva a asociacións e colectivos activistas. Quen busque unha alternativa similar para a súa familia, escola, administración ou empresa deberá recorrer a outras opcións que Framasoft tamén recomenda.
Cada espazo ten un límite de 50 contas de usuario e 50 GB de almacenamento compartido entre todo o colectivo.
Por que o fai Framasoft?
Detrás do proxecto hai varias motivacións:
Unha alternativa ética: fronte ao uso cada vez máis estendido de ferramentas como Microsoft Office 365 ou Google Workspace entre as asociacións —que Framasoft considera “tóxicas” e contrarias aos valores destas entidades—, Framaspace quere dar ferramentas gratuítas que lles permitan actuar con máis forza e eficacia.
Educación popular: máis aló da tecnoloxía, o proxecto busca fomentar a cooperación, a solidariedade e o intercambio de coñecemento entre as persoas usuarias, convertendo a ferramenta nun pretexto para facer comunidade.
Unha declaración política: ofrecer gratuitamente ata 10.000 espazos non é só un reto técnico, senón tamén unha forma de empoderar e dar lexitimidade aos colectivos activistas, afirmando que a súa loita é necesaria para construír un futuro mellor.
Sen publicidade nin recollida de datos
Framaspace é gratuíto, sen publicidade nin trampas de clics. Framasoft asegura recoller a mínima cantidade de datos posible e non ter ningún interese en rastrexar o comportamento das persoas usuarias nin en explotalo comercialmente.
Quen está detrás?
Framasoft é unha asociación francesa sen ánimo de lucro fundada en 2004, dedicada á educación popular sobre os retos do dixital e os comúns culturais. Conta con 35 membros (10 delas asalariados) e mantén máis de 40 proxectos, entre eles unha vintena de servizos éticos en liña e programas como PeerTube. Recoñecida de interese xeral en Francia, finánciase nun 94 % grazas ás doazóns das persoas usuarias, xa que —como lembran desde a propia entidade— “libre non quere dicir gratis”.
