Durante os meses de abril e maio, a Oficina de Software Libre da USC percorreu un total de sete centros do campus compostelán co propósito de difundir, a través dos PIF (Puntos de Información polas facultades), o uso do software libre entre os distintos colectivos universitarios. Analizados os resultados acadados nesta primeira etapa, o persoal técnico da oficina valora moi positivamente a experiencia e confía poder continuar con seu itinerario divulgativo a finais deste ano polo resto de escolas e facultades.
Con esta iniciativa distribuíronse preto de 1.000 exemplares do sistema operativo Galinux e uns 150 da distribución Ubuntu (tanto a versión 8.10 como 9.04). A maiores instaláronse varias Ubuntu USC, dende o propio repositorio da entidade académica, e ofreceuse asesoramento en materia de software libre a todas as persoas que así o demandaron.
Estes datos, xunto cos referentes ao reparto de 3.000 dípticos informativos, contribuíron a crear unha idea máis asentada sobre as vantaxes do software libre entre a comunidade universitaria. No entanto, segundo aseguraron os responsábeis da iniciativa, “cómpre resaltar a existencia dunha grande comunidade que xa coñecía e empregaba GNU/Linux, e que mesmo animaba aos seus semellantes a facer uso del debido aos resultados satisfactorios que conseguiran”.
Destacan, ademais, que “foi unha grata sorpresa o gran interese amosado pola xente, entre os que podemos distinguir aos máis tímidos, que non preguntaban pero que se levaban os trípticos e livecds e os non tan tímidos que viñan e te interrogaban sen parar, os que se atrevían a probar o GNU/Linux nos portátiles que alí dispuñamos, e finalmente os máis afoutos que ían máis alá instalando o GNU/Linux mediante arranque dual no seu portátil”.
Na primeira etapa dos PIF visitouse a Facultade de Ciencias de Educación e Psicoloxía (1,2 e 3 de abril), a Escola Técnica Superior de Enxeñaría (13, 14 e 16 de abril), a Facultade de Filosofía (22 e 23 de abril), a Facultade de Ciencias Económicas e Empresariais (5 de maio), a Facultade de Ciencias da Comunicación (6 de maio) e a Facultade de Xeografía e Historia (18 de maio).
En varios destes puntos habilitouse o PIF en horario ininterrumpido, dende as 10 ata as 19 horas, co obxecto de chegar ao maior número de persoas. Deste xeito, estímase que o número aproximado de persoas que se achegou aos PIF foi superior ás 1.500, acadando unha media diaria dun cento de persoas en cada PIF.
Reportaxe gráfica da primeira etapa dos PIF: http://picasaweb.google.es/oslusc/PIF
Fonte: OSLUSC
