A Rede de Dinamización da Sociedade da Información inaugura mañá ás 19 horas un novo Centro de Dinamización da Sociedade da Información no Vicedo. A nova aula estará localizada na rúa Cidade de Mondoñedo, no número 23. O Centro de Dinamización da Sociedade da Información do Vicedo está totalmente equipado para que o persoal dinamizador da Rede de Dinamización poda achegar á poboación as novas tecnoloxías. O centro acollerá diversos obradoiros de índole tecnolóxica variada, como poden ser de iniciación á Internet, á Informática ou a outras ferramentas.
A Consellaría de Innovación e Industria dotou este centro cun equipamento informático conformado por 8 ordenadores, 4 cámaras web, 7 lectores de DNI electrónico, dúas impresoras (a cor e en branco e negro), un escáner, un canón proxector e unha cámara de fotos dixital. Este hardware traballará integramente sobre aplicativos de fontes abertas.
Cabe destacar que, antes da inauguración deste centro, a Rede xa estaba presente no Vicedo, onde iniciou a súa actividade en febreiro de 2007. Desde esa data, foron xa 175 os usuarios e usuarias que se deron de alta para usar as instalacións da Rede. Un 56% destes son mulleres. Se atendemos ás idades, un 22% teñen entre 25 e 34 anos, un 17% están entre 35 e 44 e un 16% entre 16 e 24.
Asemade, desde xaneiro do 2008, fixéronse 1.340 usos das instalacións da Rede en horario de aula aberta -no que se pode acceder libremente ao uso dos computadores-. Tamén hai que destacar que se levan realizados 55 obradoiros, nos que se formou a 216 persoas ao longo de 503 horas. A composición destes participantes foi dun 58% de mulleres. Mirando as idades, un 22 tiñan entre 55 e 64, un 21% eran maiores de 65 e un 15% situábanse entre os 35 e 44 anos.
Fonte: Rede de Dinamización
