Numpty Physics, xogo de simulación de física

Numpty Physics é un xogo de debuxo de quebracabezas que consiste en crear bloques, ramplas, balanzas ou calquera cousa que necesites para conseguir que a bola vermella chegue ata a estrela amarela. Para iso, o xogo está dotado dun motor físico (Box2D Physics Engine) que fai que calquera forma que se debuxe, responda de forma case totalmente real, dependendo da súa forma e tamaño.

Este xogo ben se pode considerar unha alternativa ao Crayon Physics que tamén usa o mesmo motor de físicas.

Ademais, Numpty Physics inclúe un editor que che permite crear os teus propios niveis. O editor consta dunha paleta de cores, ademais de diversas ferramentas de trazado (para debuxo de obxectos activos, inactivos ata que non entren en contacto cun obxecto activo e decoración do escenario). Os niveis editados poden ser posteriormente gardados e mesmo enviados por correo electrónico aos desenvolvedores do proxecto.

Para aqueles que acaben os niveis predefinidos que trae o xogo, desde a páxina do proxecto tamén se pode atopar un conxunto de novos niveis feitos polos usuarios.
O xogo conta ademais cuns requirimentos mínimos de hardware que fan que funcione en dispositivos móbiles. Grazas a isto, pódense atopar descargas para as seguintes plataformas:

• Maemo OS2008
• Maemo OS2008 (770)
• Ubuntu 32/64 bits
• RPM
• Windows
• Mac OS X Intel
• FreeBSD
• OpenSolaris
• Windows Mobile

Captura de pantalla do Numpty Physics:

Páxina do proxecto:
http://numptyphysics.garage.maemo.org/