O mércores 22 de novembro, en horario de 18.30 a 20.30, terá lugar a charla organizada por Gpul “Steam Deck, como se creou unha máquina de videoxogos usando Linux”, na Facultade de Informática da Coruña.
A Steam Deck é unha máquina de videoxogos portátil que saiu á venda no ano 2022 e que usa SteamOS, un sistema operativo baseado en GNU/Linux. Nesta charla un dos membros do equipo de SteamOS dará unha visión xeral do sistema operativo e das súas funcións principais, con algúns exemplos do traballo que foi necesario para sacar ao mercado unha máquina como esta, e de como ese traballo está a mellorar o ecosistema GNU/Linux en xeral.
Alberto García é un dos socios da empresa Igalia, onde leva máis de 20 anos traballando no mundo do software libre en todo tipo de proxectos. É un desenvolvedor activo de Debian e ten anos de contribucións a proxectos como QEMU. Na actualidade é membro do equipo de SteamOS, o sistema operativo da Steam Deck.
