Fonte: 2026 State of Open Source Report.
Un novo estudo internacional, elaborado por Perforce OpenLogic coa colaboración da Open Source Initiative (OSI) e a Fundación Eclipse, preguntou a máis de 700 profesionais do mundo tecnolóxico sobre o uso do software libre ou de código aberto nas súas empresas.
Estas son as conclusións máis importantes:
1. As empresas queren ser independentes
Máis da metade das persoas (55%) dixeron que usan software de código aberto principalmente para non depender dun único provedor. É dicir, para non quedar “atrapados” nunha empresa que lles poida subir os prezos ou deixar de darlle soporte ao seu produto. En Europa, este dato chega ata o 63%. É o maior crecemento dun ano para outro en toda a historia do informe.
2. Máis traballo de mantemento que de innovación
Nas grandes empresas, 6 de cada 10 traballadores dedican máis da metade do seu tempo a resolver problemas e facer mantemento, en vez de crear cousas novas. Isto é especialmente notorio nos equipos que traballan con Java, onde moitos profesionais dedican moi pouco tempo ao desenvolvemento de novas funcionalidades.
3. A seguridade segue sendo o gran punto débil
A pesar dos avances, a xestión de vulnerabilidades (é dicir, os fallos de seguridade) segue sendo un problema serio:
- 1 de cada 5 empresas non ten ningún proceso definido para responder a alertas de seguridade.
- Máis dun terzo das grandes compañías non consegue corrixir os fallos de seguridade a tempo.
- Máis da metade das organizacións que suspenderon auditorías de cumprimento seguían usando software que xa non recibe actualizacións.
O software de código aberto pasou de ser unha opción técnica a converterse nunha decisión estratéxica para as empresas. Pero adoptar este tipo de software non abonda: fai falta organizarse ben, definir responsabilidades claras e, sobre todo, tomarse en serio a seguridade.
