Enxeñería Sen Fronteiras Galicia organiza a súa Escola de Verán 2026, unha semana chea de talleres e charlas (gratuítos), para introducir aos asistentes a ferramentas e proxectos de tecnoloxías libres. Non fai falta ter coñecementos previos: os talleres están pensados para que calquera persoa con curiosidade poida aprender e participar.
Cando e onde
A actividade terá lugar do 13 ao 17 de xullo de 2026 na Sala de Grados 2 da Escola Técnica Superior de Enxeñaría de Camiños, Canais e Portos da Universidade da Coruña, no Campus de Elviña (A Coruña). Aconséllase aos asistentes traer o seu propio portátil cos programas necesarios instalados para cada taller.
Once charlas/talleres para todos os gustos
O programa inclúe once propostas moi variadas que percorren desde a radiocomunicación sen licenza ata a tradución colaborativa de software, pasando por electrónica, modelado 3D, redes sen internet e accesibilidade:
- Bandas Libres (13 de xullo): introdución ás radiocomunicacións sen licenza —PMR446, Banda Ciudadana e Meshtastic— con actividades prácticas para comunicarse.
- Modelado 3D con FreeCAD e cálculo por elementos finitos (13 de xullo): achegamento á ferramenta libre de deseño 3D FreeCAD e análise estrutural das pezas creadas.
- Introdución á electrónica (13 de xullo): conceptos básicos para aprender a reparar ou crear os propios dispositivos electrónicos.
- Meshtastic: comunicación á marxe de Internet (14 de xullo): como montar o primeiro nodo nunha rede mallada descentralizada e supervisala con MeshMonitor.
- Caixa de ferramentas para administración de sistemas (14 de xullo): fluxo de traballo real con ferramentas como restic, Gotify e Uptime Kuma para xestionar equipos e servidores de forma libre, segura e automatizada.
- Desenvolvendo unha aplicación de accesibilidade en RV con Godot (15 de xullo): introdución ao motor de videoxogos libre Godot e demostración do proxecto VRAO, unha app de realidade virtual para persoas con mobilidade reducida.
- Debate sobre IA xenerativa en formato Open Space (15 de xullo): un espazo aberto a todo o público para reflexionar sobre a intelixencia artificial xerativa.
- Fotografía e fotogrametría con drons + Blender (16 de xullo): modelado 3D a partir de fotografía aérea con WebODM e retoque posterior en Blender.
- Como empezar no Fediverso (16 de xullo): introdución ás redes sociais federadas e descentralizadas como alternativa ao modelo das grandes plataformas.
- Como mellorar a accesibilidade dos teus contidos multimedia e ofimáticos (17 de xullo): consellos prácticos para facer máis accesibles documentos, vídeos, imaxes e páxinas web.
- Taller de tradución de software libre ao galego (17 de xullo): aprende a contribuír traducindo WordPress e os produtos Mozilla (Firefox) mediante as plataformas translate.wordpress.org e Pontoon. Non se precisan coñecementos técnicos, só un nivel básico de inglés e ganas de participar.
Encontro anual dos bancos de reciclaxe electrónica de Galicia
O 15 de xullo pola noite celebrarase tamén o Encontro dos bancos e banquetas de reciclaxe electrónicos galegos, unha reunión anual informal dos distintos colectivos galegos dedicados á reciclaxe e reutilización de dispositivos electrónicos.
Como apuntarse
A inscrición xa está aberta. Abonda con enviar un correo indicando os talleres de interese a: bancoreciclaxecoruna@galicia.isf.es
Os materiais e presentacións dos talleres estarán dispoñibles proximamente nun repositorio público. Máis información na web do evento
