Os Repair Cafés non só arranxan lámpadas ou bicicletas: agora tamén instalan Linux e danlles nova vida a ordenadores que parecían obsoletos. Dende que Repair Café International puxo á disposición da súa rede un paquete de inicio para organizar sesións de instalación de Linux —dispoñible en neerlandés, inglés, francés, alemán e español—, o número de cafés que ofrecen este servizo non para de medrar. Francia é un bo exemplo diso.
Dez anos reparando en Albi, agora tamén con Linux
O Repair Café de Albi, no departamento do Tarn ao sur de Francia, celebra este ano o seu décimo aniversario. Os seus encontros mensuais combinan a reparación de obxectos con cea compartida, nun ambiente festivo e comunitario. Foi o tesoreiro Jean-Claude Le Floc’h quen propuxo engadir a instalación de Linux á lista de “reparacións” que ofrecen.
Jean-Claude ten un historial profesional con Unix, o sistema do que deriva Linux, e leva anos instalándoo nos seus propios ordenadores. Para el, o software libre representa unha saída real ao dominio de Microsoft. “Ao primeiro encontro de Linux viñeron unhas cinco persoas e dende entón a demanda non para de crecer. Dá moita satisfacción instalar Linux Mint con éxito”, conta con orgullo.
En Marly, a solución contra a obsolescencia programada
No norte de Francia, o Repair Café de Marly tamén adoptou Linux como ferramenta de reparación. A iniciativa partiu de Flavien Collet, que ve en Linux a resposta directa á obsolescencia programada que impón a industria tecnolóxica: “Para min, Linux é a solución contra a caducidade forzada dos portátiles que nos impoñen Microsoft e Apple.”
Dende finais de 2024 xa realizan instalacións de Linux no seu Repair Café, especialmente en Macs. O resultado foi moi positivo. “Cando lles ofreces á xente a elección entre mercar un ordenador novo por polo menos 400 euros ou seguir usando o seu durante cinco anos máis de xeito legal e gratuíto, a decisión é fácil de tomar”, explica Flavien.
Consellos para Repair Cafés que queiran empezar
Flavien Collet comparte dous consellos para os grupos que queiran incorporar Linux aos seus encontros:
Fai sempre unha copia de seguridade antes de instalar. É fundamental que o usuario garde todos os seus ficheiros importantes nun disco externo ou na nube antes de comezar. Os voluntarios poden axudar nesa tarefa para evitar perdas de datos.
Non abonda con instalar: hai que acompañar. Instalar Linux é só o primeiro paso. Moitos usuarios, especialmente os de máis idade, necesitan apoio para adaptarse ao novo sistema. Ofrecer obradoiros de iniciación axuda a eliminar o medo ao cambio e resolve dúbidas básicas como o acceso ao correo electrónico.
Como participar na rede global
Repair Café International pon á disposición de todos os grupos interesados un paquete de inicio con directrices, materiais e un manual para novos usuarios de Linux. Os Repair Cafés xa rexistrados na rede poden descargalo dende a súa conta. Os que aínda non forman parte dela poden rexistrarse para acceder a estes recursos.
Todos os Repair Cafés Linux quedan incluídos no mapamundi de Repair Café International, onde calquera persoa pode buscar o punto máis próximo escribindo “linux” no campo de busca.
Fonte: repaircafe.org — https://www.repaircafe.org/es/cada-vez-hay-mas-repair-cafes-linux-tambien-en-francia/
