O público da rede de bibliotecas de Galicia terá que interactuar, a partir do verán, con Software Libre para calquera consulta que queira realizar a través dos terminais destas entidades.
Esta realidade confírmase unha vez que a Consellería de Cultura e Deporte vén de facer público o procedemento, por concurso aberto , para o contrato de subministración de equipamentos informáticos para as bibliotecas públicas de Galicia.
Segundo o anuncio publicado no DOG do 23 de maio , a Consellería de Cultura e Deporte dotará a rede de bibliotecas con novo hardware e software por importe de 100.000 euros. Aínda que os computadores para o desenvolvemento do traballo interno funcionarán, aínda, sobre sistemas operativos privativos, o resto do software basearase fundamentalmente en código aberto.
Deste xeito, os ordenadores para uso público traballarán coa última versión da distribución de GNU-Linux Ubuntu e todos os terminais, independentemente do seu uso interno ou externo, deberán vir co paquete de oficina libre OpenOffice.
A presentación de ofertas ao concurso permanecerá aberta ata o vindeiro día 10 de maio. O prego de prescripcións técnicas para o mesmo está accesible na sección de contratación administrativa da páxina web da Xunta .
