A Universidade Nacional Autónoma de México (UNAM) organiza, a través do seu Proxecto de Investigación Psicoeducativa, o “Cuarto Encontro en Liña de Educación e Software Libre, EDUSOL 2008“, que se celebrará do 10 ao 21 de novembro de 2008 e no que se abordará como tema xeral a “Sociedade do coñecemento e cultura libre”.O encontro EDUSOL ten como obxectivo a posta en común de experiencias educativas con Software Libre, así como a reflexión sobre as mesmas e a creación de novas propostas a partir das opinións e os debates xerados.
Con este propósito os organizadores do evento invitan a docentes, investigadores, desenvolvedores de Software Libre e persoas interesadas no ámbito educativo a participar na modalidade de relatorio, obradoiro, titorial ou simposio por IRC. A recepción destas propostas permanecerá aberta até o vindeiro 15 de outubro.
Asemade, as persoas que desexen participar exclusivamente como asistentes para discutir e colaborar conxuntamente, poderán inscribirse até o 2 de novembro.
Mancomún participa dunha experiencia similar en España
O Congreso Nacional Internet na Aula celebrado simultaneamente en Madrid, Barcelona, Granada e Santander entre os días 26 e 28 de xuño tivo unha orientación moi similar a do encontro EDUSOL, no que se refire á súa modalidade online.
O evento concluíu cun rotundo éxito de participación de docentes, dos cales 3.000 amosaron o seu interese pola vertente das tecnoloxías abertas no eido educativo. Mancomún participou no Congreso Presencial Internet na Aula achegando aos participantes do mesmo os logros acadados polo Centro.
