Mozilla lanzou Firefox 152, nova versión do seu popular navegador de código aberto. Aínda que non se trata dunha actualización revolucionaria, chega con melloras prácticas que farán máis cómoda a experiencia do día a día para moitas persoas usuarias.
Axustes cun look completamente novo
A pantalla de configuración do navegador estréase cunha imaxe renovada: mellor organizada, con agrupacións máis claras e navegación máis sinxela. Quen adoite personalizar Firefox notará que atopar o que busca é agora bastante máis doado.
Navegación privada máis flexible
Unha das melloras máis interesantes desta versión afecta ao modo de navegación privada. Ata agora, se o bloqueo de rastrexadores rompía o funcionamento dunha páxina web, non había moito que facer sen desactivar a protección por completo. Con Firefox 152, é posible recargar só a pestana problemática desactivando temporalmente a protección estrita, mentres o resto das pestanas seguen protexidas. Un bo equilibrio entre privacidade e comodidade.
Silencia o navegador dende a barra de enderezos
Outra novidade curiosa é a posibilidade de silenciar todas as pestanas de golpe simplemente escribindo mute, shush ou sssh na barra de enderezos e activando a acción correspondiente. Ideal para eses momentos en que un vídeo comeza a soar no peor momento posible. Esta función pódese desactivar dende Axustes > Buscar > Barra de enderezos.
Copia de ligazóns de pestanas máis áxil
Firefox 152 tamén incorpora a opción de copiar o enderezo dunha pestana dende o menú contextual sen necesidade de abrila. Ademais, se tes varias pestanas seleccionadas, podes copiar todas as ligazóns ao mesmo tempo. Para quen traballa con moitas pestanas abertas, un pequeno pero moi útil alivio. Tamén se engade un novo botón de “enviar pestana” que se pode engadir á barra de ferramentas para compartir contido con facilidade.
O tradutor integrado fala galego
O tradutor integrado de Firefox engade soporte para o galego e o éuscaro. Isto significa que as persoas galegofalantes poderán traducir páxinas web directamente dende o navegador sen recorrer a ferramentas externas.
O de sempre: seguridade e corrección de erros
Como en cada versión, Firefox 152 inclúe os correspondentes parches de seguridade, corrección de erros e melloras para persoas desenvolvedoras. Pequenos axustes que, xuntos, contribúen a manter o navegador en forma.
*Fonte: Notas da versión 152
