Brasil deu un paso pioneiro na protección da infancia en liña. A Lei 15.211/2025, coñecida como Estatuto Dixital da Infancia e a Adolescencia (EDCA), entrou en vigor o 17 de marzo de 2026 e convértese nunha das normativas máis estritas do planeta sobre o uso de tecnoloxía por parte de menores. O seu impacto vai directamente ás aulas: calquera software ou aplicación que se empregue nos centros educativos brasileiros debe cumprir unha serie de requisitos esixentes en materia de privacidade e protección de datos.
Que obriga a facer a nova lei?
O EDCA non deixa marxe á interpretación. Todo produto informático destinado a nenos e nenas —ou que poida ser usado por eles— ten que garantir a súa protección integral. Entre as principais obrigas destacan:
- Privacidade por defecto. Os programas deben ofrecer o máximo nivel de protección de datos desde o primeiro momento, sen necesidade de configuración adicional.
- Prohibición do perfilado conductual. Está vetado analizar o comportamento, preferencias, situación económica ou localización dos menores con fins comerciais ou de calquera outro tipo.
- Sen publicidade nin deseños adictivos. Queda expresamente prohibido calquera mecanismo deseñado para manter aos nenos enganchados: reproducción automática, recompensas, notificacións innecesarias ou recomendacións personalizadas.
- Educación en cidadanía dixital. A lei esixe que as ferramentas tecnolóxicas promovan un uso crítico, responsable e seguro da tecnoloxía.
- Transparencia e auditabilidade. Os provedores deben poder ser auditados, ter representación legal en Brasil e publicar informes de transparencia.
Nada queda fóra: calquera suite ofimática ou ferramenta de produtividade usada en dispositivos escolares está incluída no ámbito desta normativa.
Por que LibreOffice encaixa sen necesidade de adaptacións?
A suite ofimática libre de The Document Foundation non foi deseñada para captar a atención dos seus usuarios nin para monetizar os seus datos. E iso, precisamente, é o que a lei esixe.
Non recolle datos por defecto. LibreOffice funciona en local, no propio equipo do centro educativo. Os documentos gárdanse onde a institución decide, sen sincronización automática con servizos na nube nin envío de información a terceiros.
O código fonte é público e auditable. Baixo a licenza Mozilla Public Licence, calquera escola, investigador ou autoridade pode revisar o código e verificar que non hai comportamentos ocultos. Non hai “caixas negras”.
Sen mecanismos manipulativos. LibreOffice abre documentos, permite traballar con eles e péchase. Nada máis. Non inclúe ningunha das funcionalidades que o EDCA prohibe.
Fomenta a cidadanía dixital real. Usar LibreOffice nas aulas ensina que o software é unha ferramenta ao servizo do usuario, que os documentos pertencen a quen os crea e que se gardan en formatos abertos (ODF), compatibles con calquera outro programa.
O formato ODF é soberanía dixital. O formato OpenDocument é un estándar aberto certificado pola ISO. Os arquivos creados hoxe poderanse abrir no futuro sen depender de permisos de ningún provedor, sen subscricións e sen ataduras a infraestruturas corporativas externas.
Os centros que usan LibreOffice non necesitan ler contratos extensos para saber que pasa cos datos dos seus alumnos, nin negociar cláusulas especiais coa empresa provedora, nin preocuparse de se unha actualización silenciosa modifica a configuración da privacidade. A arquitectura fala por si mesma.
Que poden facer os centros educativos?
The Document Foundation chama á acción a directivos, docentes e responsables de compras públicas:
- Auditar as plataformas actuais para comprobar se cumpren os requisitos do EDCA en materia de privacidade e protección de datos.
- Avaliar LibreOffice como solución de produtividade para as aulas, incluíndo as ferramentas de xestión centralizada para grandes despregamentos.
- Adoptar o formato ODF como estándar institucional para garantir a portabilidade e apertura dos documentos.
- Participar na comunidade. LibreOffice é desenvolvido por unha comunidade global con forte presenza en América Latina. As escolas non só usan a ferramenta: tamén poden contribuír ao seu desenvolvemento.
O Estatuto Dixital da Infancia e a Adolescencia protexe aos menores nas contornas dixitais. LibreOffice é un software que nunca foi deseñado para extraer valor deles. Non é casualidade: é o resultado dunha visión compartida sobre o papel da tecnoloxía nunha sociedade democrática, onde as ferramentas están ao servizo das persoas e non ao revés.
Fonte: Blog da Comunidade Hispana de The Document Foundation. Autor: Daniel A. Rodriguez. Publicado o 24 de marzo de 2026.
