O software libre segue gañando terreo nas administracións públicas de todo o mundo, e o último gran exemplo chega desde Austria. O Bundesheer, o Exército Federal austríaco, completou unha das migracións máis importantes de Europa: substituíu Microsoft Office por LibreOffice en preto de 16.000 equipos. E o máis salientable non é só a cifra, senón como o fixeron: con calma, planificación e moito acompañamento aos usuarios.
Todo comezou pola nube
A historia arrinca en 2020, cando o Exército austríaco observou que cada vez máis fabricantes de software levaban as súas aplicacións cara a modelos baseados na nube. Isto encendeu unha alarma: como garantir que os documentos e datos sensibles da institución non saísen nunca da súa propia infraestrutura? A resposta pasaba por dispoñer dunha suite ofimática que puidese funcionar de xeito totalmente local, sen depender de servizos externos.
Tras máis de dous anos de análise técnica e organizativa, entre finais de 2022 e comezos de 2023 o Ministerio Federal de Defensa deu luz verde oficial ao cambio a LibreOffice. E non foi unha decisión menor: chegou desde o máis alto nivel do Ministerio, que valorou os riscos de depender de provedores tecnolóxicos únicos antes de autorizar o proxecto como unha aposta estratéxica a longo prazo.
O que máis chama a atención deste proceso é o seu ritmo: nada de impoñer o cambio de golpe. Primeiro, LibreOffice ofreceuse de forma opcional, para que quen quixese o puidese instalar e ir familiarizándose con el. O resultado foi mellor do esperado: preto de 8.000 persoas, a metade de todo o persoal, instalaron LibreOffice por vontade propia nesa primeira fase.
Despois, ao longo de 2023, algunhas áreas comezaron a usalo de xeito obrigatorio, gañando experiencia real antes do gran salto. E finalmente, en decembro de 2024, LibreOffice converteuse na ferramenta oficial e obrigatoria para todo o traballo interno do Bundesheer, pechando así un proceso que durou case catro anos.
Formar e acompañar, non só instalar
Os responsables do proxecto tiñan claro dende o principio que trocar o programa non chega: hai que coidar á xente que o vai usar cada día. Por iso puxeron a disposición de todo o persoal cursos en liña, vídeos explicativos e uns “cursos exprés” de só quince minutos para Writer, Calc, Impress e Base, pensados para resolver as dúbidas máis típicas ao pasar de Microsoft Office.
Ademais, crearon o “Consello da semana”, unha publicación que aparece cada luns na intranet do Exército con trucos, solucións a problemas comúns, novidades das versións e melloras financiadas polo propio Bundesheer para LibreOffice. Tras máis de dous anos publicando sen parar, converteuse nunha das ferramentas de apoio máis valoradas polos usuarios.
Unha lección para outras administracións
A experiencia austríaca deixa unha ensinanza clara: unha migración masiva a software libre non depende só de escoller a ferramenta axeitada. O éxito veu dunha combinación de planificación a longo prazo, respaldo institucional firme, implantación gradual, formación continua e comunicación constante cos usuarios. Deixar que a xente coñecese LibreOffice con tempo, antes de obrigala a usalo, reduciu a resistencia habitual neste tipo de cambios tecnolóxicos.
Fonte: Blog da Comunidade Hispana de The Document Foundation, artigo de Daniel A. Rodriguez (7 de agosto de 2026).
