A partir de xullo de 2026, os conxuntos de datos xeoespaciais do programa INSPIRE deixarán de ter un portal propio e pasarán a estar dispoñibles a través do Portal Europeo de Datos (data.europa.eu). O cambio busca facilitar o acceso a esta información xunto aos millóns doutros conxuntos de datos públicos que xa recolle a plataforma europea.
Como parte desta transición, o Xeoportal INSPIRE pechará as súas portas nesa mesma data, e todo o contido do rexistro INSPIRE (vocabularios controlados, listas de códigos e demais recursos semánticos) trasladarase ao sitio EU Vocabularies, para que ninguén perda o acceso a esta información.
Máis doado de atopar, nun só sitio
Ata agora, quen quixese consultar datos xeoespaciais europeos tiña que acudir a unha ferramenta específica. Coa integración no Portal Europeo de Datos, estes conxuntos de datos convivirán cun catálogo moito máis amplo, que abrangue temas tan variados como a mobilidade, o medio ambiente, a enerxía, a saúde ou os servizos públicos.
Para que a busca de datos xeoespaciais siga sendo cómoda, o portal incorpora ferramentas específicas:
- Un filtro xeoespacial para atopar rapidamente este tipo de conxuntos de datos.
- Un panel de control dedicado aos conxuntos de datos de alto valor (entre eles os xeoespaciais), con estatísticas por categoría, país, calidade dos metadatos e formato.
- Un visor xeográfico que permite previsualizar os datos directamente no portal antes de descargalos, para saber de antemán se son os que se necesitan.
Ademais, prevese engadir novas opcións de filtrado específicas para os datos INSPIRE nun futuro próximo.
Segundo destaca a propia iniciativa, este novo enfoque beneficia a un público moi amplo: investigadores, responsables políticos, persoal desenvolvedor, xornalistas ou calquera persoa interesada en explorar datos abertos. Todos eles poderán descubrir, acceder e reutilizar información xeoespacial de toda Europa a través dunha única plataforma, máis moderna e integrada.
Fonte: data.europa.eu
